EN outre, afin que ceux qui s’eſtiment dignes & capables de commander aux autres, s’abſtinſſent non ſeulement de temerité & d’arrogance, mais auſſi de toute des-honneſte entrepriſe, ils feignent que Pâris pour complaire aux concupiſcences de ſa chair, negligez les honneurs, les threſors & Royaumes de Iunon, & la ſapience de Pallas, & que le iugement qu’il donna en faueur de Venus, ſouſtenu par les ſiens, cauſa la deſtruction & ruine de ſa patrie auec l’Empire d’Aſie que poſſedoit la maiſon dont il eſtoit iſſu. Ainſi vouloient-ils exhorter les Princes à l’acquiſition des vertus dignes de leur qualité, c’eſt à ſçauoir à temperance, continence, ſageſſe & crainte de Dieu ; joint que, ny Nobleſſe, ny richeſſes, ny puiſſance aucune ne merite point de porter, ny ſceptre en main, ny couronne ſur la teſte, ſi elle eſt depourueuë de ſageſſe & autres vertus neceſſaires pour le gouuernement d’vn Eſtat. Car qui pourra long-temps prendre plaiſir en vn iugement, ou fol, ou inique ? ou bien qui eſt l’homme qui finalement ne ſe trouue mal des forfaits & mal-verſations par luy commiſes ?