LEs Pythagoriens voulans prouuer que tous les corps celeſtes font vne harmonie & concert de Muſique, & rendent diuers ſons ſelon la grandeur ou viſteſſe de leurs ſpheres, ils introduirent les noms des Muſes ; & premierement, à l’imitation des planetes, accommoderent ſept chordes à leurs inſtrumens de Muſique, auſquelles on en adiouſta depuis pluſieurs autres. Ainſi donc Pythagoras donnoit à connoiſtre que la Muſique eſt vne ſcience diuine, capable de refrener les ſales concupiſcences des hommes, & courtoiſer leurs mœurs. Ce qu’ils faiſoient preſider les ames de ces corps celeſtes ſur la Poëſie ; cela ne ſignifioit autre choſe ſinon que les affaires de ce monde ſont gouuernees par vn eſprit diuin, & que les corps celeſtes peuuent beaucoup ſur les choſes humaines : en vn mot, que toute connoiſſance de quelque faculté que ce ſoit, procede du ciel.