OR afin que perſonne n’eſtimaſt que ſes delicts peuſſent eſtre long temps cachez apres auoir commis quelque forfait & laſcheté, les Anciens ont controuué la Fable d’Arion, pour nous apprendre que meſme les oyſeaux du ciel, ou les beſtes foreſtieres & champeſtres ; ou les poiſſons de la mer s’eſleueront quelque iour en ſuffiſant teſmoignage pour nous conuaincre de meſchanceté, ſi les hommes ne veulent teſmoigner contre nous, ny deceler les vices ou les crimes des mal-faicteurs, & ſecourir les gents de bien qui ſont en peine ; veu que Dieu toſt ou tard venge & punit toute meſchanceté.