De l’Aurore.

D’Autre part ils n’ont pas exprimé par leurs contes fabuleux les mouuemens du Soleil & de quelques autres planetes ſeulement, mais auſſi les effects de telles ou telles eſtoilles qui deſploient ordinairement leur force ça bas. Ainſi cette clarté qui paroiſt deuant le leuer du Soleil lors que le Ciel cõmence premierement à rougir, a eſté nommee Aurore, parce qu’alors nous ſentons ordinairement ſouffler vne aure plaiſante & douce. Or la nature de l’air trouble & des vapeurs qui continuellement s’eſleuent en haut, fait que la lumiere de l’Aube paroiſt rougeaſtre : c’eſt pourquoy les Poëtes l’appellent roſine. Quant à ce qu’ils ont eſcrit de Memnon, comme ainſi ſoit qu’il ait regné vers l’Orient, tout cela concerne l’hiſtoire.