Puys que respondre tu ne veulx, Je ne te prendray aux cheveulx, Lyon, mais sans plus te semondre Moy mesmes je me veulx respondre Et seray le prebstre Martin Ce Grec, cest Hebreu, ce Latin, Ont descouvert le pot aux roses Mon Dieu, que nous voyrrons de choses, Si nous vivons l’aage d’ung veau Et puys, que dict on de nouveau? Quand part le Roy? aurons nous guerre? Ô la belle pièce de terre! Il la fault joindre avec la myenne. Mais toutefois la Bohemienne Me hait encores à chapperon. Ne donnez jamais l’esperon A cheval, qui vouluntiers trotte. D'où vient doncques que je me frotte Aux coursiers, & suys tousjours rat Ilz escument comme ung verrat En plaine chaise, ces cagotz, Et si n'alleguent que fagotz Contre ces pauvres hereticques Non pas que j’oste les practiques Des vieilles qui ont si bon cueur Car comme dict le grant mocqueur Elles disent bien la partie.