Tethys & Thetis.

CHAPITRE III.

Genealogie de Tethys.THETYS, femme de l’Ocean, fut auſſi fille de la Terre & du Ciel, ſuiuant la Theogonie d’Heſiode :

Elle engendra du Ciel la plaine Oceanine, Cœe, Rhee, Themis, & Thie & Mnemoſyne, Crie, & Hyperion, & la belle Tethis : Iapete, Phœbé ; treſſant d’or ſes tortis.

Ils l’appellent mere des Deeſſes, & l’Ocean leur pere. Et de Thetis.Mais Thetis ſuiuant cet orthographe, fut fille de Chiron, ſelon Epicharme és nopces d’Hebé. Toutefois Homere en l’hymne d’Apollon la faict fille de Neree ; ce qu’auſſi teſmoigne Anaxandride Rhodien, & Euripide en ſon Iphigenie. Mariee à Pelee.Cette-cy fut femme de Pelee, & eut la reputation d’eſtre la plus belle femme du monde, des nopces de laquelle Apollodore eſcrit en cette manière : On dit qu’il n’y eut que Iupiter & Neptun qui diſputerent à qui l’eſpouſeroit : mais Thetis ne voulut pas coucher auec Iupiter, pource que Iunon l’auoit nourrie, dequoy Iupiter indigné la donna par deſpit en mariage à vn mortel. Les autres diſent que Iupiter, Apollon & Neptun firent l’amour à Thetis, & que Iupiter fut tout preſt de l’eſpouſer : Voyez en Promethee cy-deſſus, liure 4 chap. 6.Promethee, ou bien (comme d’autres veulent dire) Themis luy fit, auſſi bien qu’aux autres ſiens corriuaulx, perdre le gouſt de cet amour, pource qu’elle deuoit engendrer vn fils plus braue & plus genereux que le pere. Or Thetis faſchee de ſe voir contrainte d’eſpouſer vn homme, eſtant en qualité de Deeſſe marine, ſe transformoit en diuerſes figures, comme ſouloit faire Prothee, tantoſt en feu, tantoſt en arbre, en rocher, en oyſeau, en lion, en tygre : ſi ne peut-elle tant faire, ny par l’ardeur de ſes flammes, ny par la rigueur de ſes griffes ou de ſes dents, que Pelee ſe deportaſt de l’aymer, & qu’il ne l’eſpouſaſt. Iſace dit que Pelee par le conſeil de Chiron embraſſa Thetis ainſi cõme elle s’eſtoit transfiguree en vne Seiche aprés pluſieurs autres formes. Pithænet au 1. liure de l’hiſtoire d’Ægine eſcrit que Thetis n’eſpouſa pas contre ſon cœur Pelee, & qu’elle ne ſe mua iamais en aucune figure, ains ſe donna volontairement à luy en mariage. Leurs nopces furent celebrees en la montagne de Pelion, où toute la Cour celeſte aſſiſta, horſmis la Diſcorde, qui ſe voyant miſe en arriere, leur ioüa vn tour de ſon meſtier ; c’eſt qu’elle ietta au milieu de l’aſſemblee vne pomme d’or, auec telle inſcription. C’eſt pour la plus belle, comme nous auons dit ailleurs. Chacun des Dieux fit ſon preſent à Thetis : Pluton luy donna vne belle eſmeraude ; Neptun, deux bons cheuaux feez, Xante & Ballie (deſquels elle accommoda depuis ſon fils Achille ; engendrez de Zephyre en vne iument appellee Harpye bazanee des quatre pieds, comme elle paiſſoit en vne prairie le long des riuages de l’Ocean) Vulcan, vn couteau ; & les autres conſequemment ; car les Anciens n’alloient point aux nopces ſans porter chaſcun ſon preſent. Elle eut pluſieurs enfans auec Pelee, leſquels elle cachoit de nuict ſous le feu pour leur repurger ce qu’ils auoient de mortel de la part du pere, & conſeruer pure & nette leur immortalité ſeparee de ſes excremens & ordures ; ainſi que par les couppelles on affine l’or & l’argent. Mais eux ne pouuans reſiſter à la rigueur du feu, s’y conſumerent ; tellement qu’elle en auoit exterminé deſia demy douzaine, lors qu’elle engendra Achille, lequel elle oignoit d’ambroiſie, durant le iour, & la nuict le cachoit ſemblablement ſous le feu : ce qu’elle continua quelque temps, iuſques à ce que Pelee l’apperceut : dequoy n’eſtant pas contente, elle ſe retira en la cõpagnie des Nereïdes. Alors Achille ſe nommoit Pyroſe, comme qui diroit ſauué du feu, & fut mis entre les mains de Chiron pour le nourrir & inſtruire : puis-apres il fut appellé Achille, pource qu’il auoit vne levre bruſlee ; deduiſant ſon nom du Grec Cheîlos, qui ſignifie levre, ſelon le teſmoignage d’Agameſtor en l’hymne qu’il fit ſur les nopces de Pelee & de Thetis. Autre methode de Thetis pour eſprouuer la qualité de ſes enfans.Neantmoins d’autres maintiennent que Thetis n’auoit pas accouſtumé de cacher ſes enfans deſſous le feu, ains qu’elle les iettoit dans vne chaudiere d’eau boüillante pour eſprouuer s’ils eſtoient mortels. Voila quant à Thetis, fille de Neree. Enfans de Thetis.Tethys femme de l’Ocean, & ſœur de Titan, engendra Ephyre qu’Epimethee eſpouſa, & Pleione femme d’Atlas, de laquelle Ouide au 5. liure des Faſtes rend ce teſmoignage :

Ocean eſpouſa Tethys la Titanide, Qui bat tout l’Vniuers de ſon onde liquide, De leur flame amoureuſe vne fille naſquit Dicte Pleioné qu’Atlas pour femme acquit, Et conioint auec elle engendra les Pleïades.

L’on fait mention de pluſieurs autres filles de l’Ocean & de Tethys : à ſçauoir Acaſte, Admete, Aſie, qui dõna nom à l’Aſie : Clymene, Idyie, Ephyre, Eudore, Eurynome, Ianire, Lyriope, Meloboſis, Metis, Plexame, Prymno, Rhodie, Thee, Thoë, Tyche, Xante, Zeuxo, Clytie, la mignonne d’Apollon. Cette-cy meuë de ialouſie ayant decelé à Orchame Roy de Babylone, l’amoureux larcin qu’Apollon auoit tiré de ſa fille Leucothoé, fut par luy abandonnee : Voyez le cha. d’Apollon.dont elle conceut tant de melancholie, que s’abſtenant de boire & de manger, & fichant touſiours les yeux ſur le Soleil (c’eſt à dire Apollon) quelque part qu’il tournaſt, elle fut par la miſericorde des Dieux muee en cette herbe que nous appellons Tourne-ſol.

¶Or nommons là ou Thetis, ou Tethys, l’vne & l’autre a eſté Deeſſe marine : & par Tethys il faut entendre l’amas des eaux qui ſe ſont retirees en vn lieu à part pour engendrer : & par Thetis, l’element de l’eau, comme il appert en l’Eclogue de Virgile dicte Pollion :

De l’antique malice encore reſteront Quelques traces pourtant qui retenter feront De nauires Thetis, qui emmurer les villes, Qui ſillonner le dos des campagnes fertiles.

Thetis, c’eſt à dire la mer. Car ſi l’Ocean ne ſignifioit toute la maſſe des eaux en general, & Tethys la matiere qui ſe ioint & vnit par l’operation de Iupiter le grand Dieu formateur de tout, auec Pelee, c’eſt à dire auec le limon, pour engendrer, ce ſeroit choſe ridicule que la mer euſt auſſi vne femme. Cette matiere doncques de laquelle toutes creatures ſont engendrees, eſtant aſſemblee en vn, a eſté qualifiee mere des Dieux & des animaux. Accomodatiõ hiſtorique.Quant aux nopces de Pelee, Staphyle au liure de la Theſſalie eſcrit, que Chiron fort entendu en l’Aſtronomie voulut rendre Pelee illuſtree, pour ce faire il eſpia la ſaiſon en laquelle il deuoit pleuuoir à bon eſcient, & fit cependant courir le bruit qu’auec la permiſſion de Iupiter il deuoit eſpouſer Thetis, & que les Dieux aſſiſteroient à leurs nopces accompagnez de grandes pluyes & d’vn froid bien aſpre. Cette ſaiſon arriuee, Pelee eſpouſa Philomele fille d’Actor Roy des Myrmidons. Les autres par tels contes taxent la fureur des desbordez & voluptueux qui pourchaſſent tous moyens pour engeoler les femmes, & ne craignent point les ruſes & les tromperies d’icelles, veu que laiſſans en arriere le ſoing de leur honneur, de leurs moyens, de leur propre vie, ils n’ont autre ſoucy que d’aſſouuir leurs brutalitez, & leurs appetits deſreglez. Mais pource qu’il y a peu de commerce entre le mortel & l’immortel, leurs nopces ne ſont point de longue duree, ny la vie auſſi de ceux qui ne recerchent que le contentement de leurs voluptez comme leur ſouuerain bien. Cela ſuffiſe quant à Thetis : diſons conſequemment de Triton.