De Phorcys.

CHAPITRE VIII.

Voyez cy deſſus liu. 7. cha. 18.PHORCYS, que les Latins nomment auſſi Phorcus, fut pareillement fils de Neptun ou de la Terre ; teſmoin Heſiode en ſa Theogonie, & naſquit auec Thaumas, Ceto, & Eurybie, qu’il dit auoir vn cœur de diamant. Liure 7. chap. 12.Toutefois Varron dit que Phorcys fut fils de la Nymphe Thooſe & de Neptun, lequel outre les ſuſdites filles, à ſçauoir les Phorcydes & Gorgones, en eut vne autre nommee Thooſe, qui de la compagnie de Neptun engendra le Cyclope Polypheme, duquel Homere au 1. liure de l’Odyſſee parle ainſi :

Mais Neptune qui bat l’Vniuers de ſou onde, Pour l’amour de Cyclope eſt en cholere & gronde Qu’à Polypheme on ait l’œil creué, qui ſe dit Auoir ſur les Cyclops plus de force & credit Qu’aucun autre qui ſoit en leur trouppe ; Thooſe, La fille de Phorcys qui les vagues compoſe, Et calme les ſouſpirs du bourſoufflé Portun, Iadis en eſcoucha chez guide-mer Neptun.

Liure 7. chap. 7. cy deſſus.Il engendra auſſi le ſerpent qui gardoit les pommes d’or des Heſperides, ſelon le dire d’Heſiode :

Finalement Phorcys par amour s’esbatant Auec Ceto luy fit cet enorme ſerpant Es fins de l’Vniuers, qui ſe cachant ſous terre L’arbre des pommes d’or ſous ſa tutelle enſerre.

Il eut en outre vne fille, Scylle, de laquelle nous diſcourerons tantoſt. Voila ce qui ſe trouue de Phorcys.

¶Mythologie de Porcys.Il fut fils de la Mer ou de Neptun, & Dieu marin : & quelques-vns le prennent pour le mouuement circulaire des eaux, qui prend ſon commencement de l’Ocean, & de l’humeur de la terre. Ceto fut ſa femme, c’eſt à dire, cette exhalaiſon qui s’eſleue par la chaleur & par les rayons du Soleil : laquelle humeur extenuee durant la grande chaleur de l’eſté deuient ſerpent : car cette exhalaiſon du Soleil attiree par ſon ardeur, eſt comme tremouſſante & oblique. Les autres aiment mieux rapporter ce conte à l’hiſtoire, diſans que Phorcys regna és Iſles de Sardaigne & de Corfou, lequel defait par Atlas en vne bataille ſur mer, ſe noya en cette deſroutte ; & ne le ſceut-on iamais peſcher ny trouuer. Parquoy le bruit courut qu’il auoit eſté receu au nombre des Dieux marins. Quant au ſurplus qu’on dit de luy, c’eſt pour donner couleur au demeurant, & le rendre vray-ſemblable. Diſons de Protee.