D’Orion.

CHAPITRE XIV.

Genealogie d’Orion.CET Orion que les fables diſent auoir eſté mis entre les eſtoilles, fut fils d’Hyriee aſſez pauure homme, fils de Neptun & d’Alcyone l’vne des filles d’Athlas ; lequel Hyriee ſe tenoit à Tanagre ville de Bœoce, hebergeant volontiers les paſſans. Or auint qu’vn iour Iupin, Neptun & Mercure tirans païs allerent prendre ſon logis, auſquels il fit la meilleure reception & chere qu’il pult, & leur ſacrifia vn bœuf vnique qu’il auoit. Eux admirans ſa pieté, & deſirans recompenſer ſa gracieuſe benignité, luy donnerent le choix de demander ce qu’il voudroit, auec aſſeurance de l’obtenir. Il leur reſpondit, qu’il ne deſiroit rien tant que d’auoir vn fils (car il eſtoit deſpourueu de lignee) que toutefois il ne ſe vouloit point marier, pource qu’il auoit promis auec ſerment à ſa feuë femme de viure en viduité (combien que quelques vns eſcripuent qu’il euſt vne femme nommee Colonie, à laquelle meſme la peau dont nous allons faire mention fut donnee en garde.) Les Dieux ſes hoſtes exauçans ſon ſouhait, prindrent la peau du bœuf qu’il leur auoit habillé, dans laquelle ils eſpancherent leur ſperme ; puis l’enuelopperent bien chaudement, & la luy mirent entre mains auec commandement de l’enfouïr ſous terre, & ne la deſueloper de dix mois. Plaiſante generation.Le terme expiré naſquit vn fils nommé Vrion, par ce que les Dieux auoient comme vriné dans ladite peau ; mais dautant que le nom n’euſt pas eſté fort honeſte, ſa premiere lettre fut changee en O, & fut dit Orion. Car on ne dit pas, comme quelques vns enſeignent, qu’il ſoit né de l’vrine, mais bien du ſperme des trois ſuſnommez. Et parce qu’on tient qu’il naſquit de la ſemence de trois Dieux, Lycophron l’appelle Tripere. Neantmoins on tient que les Bœociens l’appelloient Candaon deuant que luy bailler le nom d’Orion. Iſace au lieu de Mercure met Apollon pour ſon troiſieſme pere. Dorion au liure des poiſſons veut qu’Orion ait eſté fils de Neptun & de Brylle fille de Minos. Heſiode eſt de meſme auis. Pherecyde le faict fils de Neptun & d’Euryale. Zezes, de Hyriee & de Brylle fille de Minos. L’enarrateur de Nicander nomme le pere d’Orion, Orice. On dit qu’il impetra de ſon pere Neptun de pouuoir marcher ſur les eaux auſſi bien que ſur la terre. Toutefois les autres dient qu’il fut de ſi grande taille, que tout au plus creux de la mer il n’alloit que iuſques aux eſpaules, ſuiuant ceſte opinion Virgile au 10. liure en parle ainſi :

Außi grand qu’Orion les grands flots de Neree Cheminant à pied fend, et la plaine azure Des eſpaules ſurpaſſe.

Orion grand veneur.Neantmoins il y a plus d’apparence d’extraire ſon nom de Oros, mot Grec ſignifiant montagne, où le gibier habite notamment. Et de fait quand il fut venu en aage, il s’adonna fort à la chaſſe, & fut grand veneur, comme le teſmoigne la quantité de chiens qu’il nourriſſoit. Sa laſciueté.Depuis il s’en alla en l’Iſle de Chio vers Oenopion, où eſtant il voulut forcer ſa femme Ærope. Ce qu’Oenopion voulant venger, empoigna Orion, & luy creua les yeux, puis le chaſſa de ſon pays & ſeigneurie. De là il ſe retira en l’iſle de Lemne, où Vulcan luy fit bon accueil ; & ayant pitié de ſon affliction, luy donna l’vn de ſes ſeruiteurs, Cedalion, pour luy ſeruir de guide (les autres adiouſtent qu’il luy donna auſſi vn cheual.) Apres il s’en alla vers l’Orient trouuer le Soleil, qui luy rendit la veuë qu’il auoit perdüe. D’autres content qu’Orion fut fils de Cenopion de Sicile, & qu’ayant violé ſa ſœur Candiope ſon pere luy creua les yeux. Puis allant en conſeil à l’oracle, il eut auis que ſi trauerſant la mer il s’en alloit en l’Orient, & qu’il dreſſaſt touſiours les concauitez de ſes yeux vers le Soleil, il recouureroit la veüe. Ce que taſchant de faire, il ouyt du bruit ſur le chemin, & fit tant qu’il veint iuſques vers les Cyclopes, l’vn deſquels il chargea ſur ſes eſpaules, qui le guida pardeuers le Soleil, lequel luy reſtitua la veuë. En apres il prit les armes contre Oenopion : mais ſes ſubjets ayans auis de la deſcente d’Orion, le cacherent ſous terre. Orion voyant qu’il n’auoit moyen de le trouuer, s’en alla en Candie, où il s’adonna à la chaſſe. Or ce ne fut pas ſeulement enuers Ærope qu’il fut tant outrageux, veu qu’il pourſuiuit auſſi l’eſpace de cinq ans les Pleiades filles d’Atlas & de Pleïone Nymphes de l’Ocean, auec leur mere : & leur euſt en fin faict de la honte, ſi par la miſericorde de Iupiter, duquel elles inuoquerent l’aide, elles n’euſſent eſté placees entre les eſtoilles. On dict auſſi que chaſſant vn iour auec Diane, il la voulut violer, & que par le commandement d’icelle il fut mis à mort par vn Scorpion qu’elle luy ſuſcita de la terre, qui le picquant au talon le fit mourir. C’eſt ce qu’en dict Euphorion. Mais Horace au troiſieſme liure des Carmes eſcrit que Diane meſme le tua d’vn coup de fleche pour auoir voulu faire effort à ſa pudicité.

Et Orion domté Par la roideur de la vierge ſagette, Pour auoir fol, contre l’honneur honneſte De Diane attenté.

Orion aimé de Diane.Les autres content qu’Orion en ſon ieune aage fut tres-beau garçon, & que Diane l’ayma fort, deliberee auſſi de l’eſpouſer : Et de l’Aurore.& meſme l’Aurore le trouua ſi beau qu’elle le rauit & l’emporta en Delos. Dequoy s’offençant Apollon, apres auoir pluſieurs fois tancé ſa ſœur, mais en vain, trouua vne aſſez belle commodité de faire mourir Orion. Car dés qu’il l’apperceut de loing leuer la teſte hors de la mer, il fit incontinent gageure auec ſa ſœur qu’elle ne ſçauroit ferir ce blanc qu’il luy montroit. Imprudemment occis par l’Aurore.Mais l’Aurore voulant faire preuue de ſon adreſſe à bien tirer, ficha ſa fleche dedans le front d’Orion. Eſtoillé.Elle ayant deſcouuert la verité du faict, obtint de Iupiter qu’en ſa faueur il le meit entre les eſtoilles. Corinne de Delos, qui dit qu’Orion naſquit à Tanagre, & qu’il repurgea beaucoup de places & endroits des animaux venimaux qui les moleſtoient, eſcrit qu’il mourut pource qu’eſtant à la chaſſe auec Latone & Diane, Son arrogance.il ſe vantoit qu’il n’y auoit beſte tant ſauuage & habile fuſt elle qui ſe peuſt empeſcher qu’il ne la tuaſt. Ces Deeſſes irritees de telle brauade ſuſciterent vn ſcorpion qui le fit mourir, & ſe teint caché ſous vne roche iuſques à ce qu’Orion paſſaſt par là. Car la couſtume de ces animaux eſt touſiours de ſe muſſer ſoubs des pierres & rochers, ſuiuant ce que dict Sophocle és Priſonniers :

Le ſcorpion ſe tient mußé ſous chaſque pierre.

Et dés qu’Orion approcha le pied de ladite roche, le ſcorpion le picqua, dont il mourut. Mais depuis Diane ayant pitié du pauure Orion, le fit mettre auec le Scorpion au nombre des eſtoilles. Les autres dient que la Terre ne pouuant pas endurer ſon inſolence procrea ce Scorpion. Autres veulent dire que Diane le tua, parce qu’il l’auoit inuitée à ioüer auec luy au palet. Les autres, parce qu’il voulut ſauuer Opis l’vne des damoiſelles qui auoient ſuiuy Diane depuis la Prouince des Hyperborees. Et de ſa femme.Au reſte ce ne fut pas ſeulement d’Orion que l’arrogance fut grande : car ſa femme Side fut auſſi tant inſolente que de s’oſer attaquer à Iunon, & conteſter auec elle touchaut la beauté : & pourtant elle la precipita aux enfers. Nicandre en ſes Theriaques eſcrit que Diane ſuſcita ledit ſcorpion alencontre d’Orion, pource que la voulant prendre à force il mit meſme ſes mains polluës ſur le voile qu’elle portoit. Et pour en eterniſer la memoire, le ſcorpion fut mis au rang des feux celeſtes. Pauſanias és Bœotiques eſcrit qu’Orion ne fut pas colloqué parmy les eſtoilles, ains que c’eſt choſe feinte & controuuee en faueur de quelqu’vn : & que ſon Tumbeau ſe voyoit à Tanagre où repoſoit ſon corps. Voila ce que les anciens nous content touchant la fable d’Orion, d’où il faut extraire leur intention.

¶Mythologie phyſique d’Orion.Orion fut fils de Neptun, de Iupiter & d’Apollon, né de leur ſemence encloſe en vne peau de bœuf. Quel monſtre eſt-ce là, bon Dieu : quelqu’vn peut il eſtre fils de pluſieurs peres ? cela peut bien eſtre vray en la generation des elemens, veu que toutes choſes ſont faictes & compoſees des elemens. Sperme des Dieux enclos en la peau de bœuf, que ſignifie.La peau de bœuf en laquelle ils enferment leur ſemence ſignifie la mer, tant à cauſe de ſon fremiſſement, que de ſon impetuoſité quand les vents y dominent  : & d’autant plus manifeſtement eſt elle la ſemence de tous les elemens, que manifeſtement & à veuë d’œil on void l’eau par la chaleur du Soleil, ſouffrir mutation. La force doncques d’Apollon, c’eſt à dire du Soleil, attire les vapeurs de l’eau, & les ſubtiliant non ſans quelque eſprit qui les accompagne, les eſleue en l’air. Or nous auons monſtré que Iupiter eſt l’air, & Neptun cet eſprit eſpars ſur les eaux & vertu viuifiante. Effect de leurs forces conjointes.Ainſi donc quand ces trois Dieux viennent à conioindre leurs forces & facultez, il s’engendre vne matiere de vents, de pluyes, de tonnerres qu’on a iadis nommé Orion. Et d’autant que la plus deliee & ſubtile partie de l’eau eſt celle qui ſurnage, on dit qu’Orion impetra de ſon pere de pouuoir marcher ſur les eaux. Quand cette matiere extenuee s’eſpanche emmy l’air, c’eſt Orion qui vient en Chio, nom tiré du Grec chéein, ſignifiant verſer ou eſpancher. Aueuglemẽt d’Orion, que deſigne.Mais voulant violer Ærope, on luy creue les yeux & le iette-on hors du pays : pource qu’il faut neceſſairement que leſdites vapeurs paſſent parmy l’air, & montent au plus haut, & cette matiere diffuſe par ce lieu là ſent que la premiere vertu du feu s’affoiblit aucunement. Car toutes choſes qui ſe meuuent d’vn mouuement non naturel, ont beaucoup de force ſur le commencement, mais bien peu ſur la fin ; parce qu’elle vient à deffaillir peu à peu en chemin. Orion ſe retirant chez Vulcan y eſt le bien venu, & conduict vers le Soleil recouure la veuë puis s’en retourne à Chio. Cela ne ſignifie autre choſe, que la circulaire & mutuelle generation & corruption des elemens. Sa mort par DianeOn dict que Diane le tua d’vn coup de fleche pour l’auoir oſé toucher : d’autant que quand les vapeurs ſont montees au plus haut de l’air, de façon qu’elles nous ſemblent atteindre la Lune, ou le Soleil, la vertu de la Lune les aſſemble en vn tas, puis les conuertit en pluyes ou vents : ainſi les deſpece-elle par ſes fleches, ou rayons, & les renuoye en bas : & la force de la Lune ſert comme de leuain à paiſtrir telle matiere. En-apres, Qu’Orion mis à mort fut tranſmué en ſigne celeſte ; pource qu’au leuer d’Orion il pleut, il vente & tonne ordinairement. Et parce que ce ſigne eſt formé de telle façon qu’ayant l’eſpee au poing il marche contre le Taureau, & pourſuit les Pleïades ſes voiſines ; on dit que les ayans rencontré il s’en amouracha, & les courut long temps, leſquelles Pleïades ſont dites du Grec pleiòn qui ſignifie l’annee, & par leur leuee preſagiſſent le commencement de l’æſté, & de l’hyuer. Or d’autant que le ſigne du Scorpion eſt à l’oppoſite de celuy d’Orion, il ſemble qu’il fuye touſiours deuant luy : Et par vn Scorpionc’eſt le ſujet qui a fait dire qu’vn Scorpion l’auoit occis par ſa picqueure. Voila en peu de paroles ce qui touche l’expoſition naturelle de cette fable. Mythologie morale.Au reſte les anciens diſans qu’Orion endura beaucoup de maux par ſa paillardiſe, ont voulu enſeigner que tout acte deſhonneſte & illegitime traine quand & ſoy beaucoup de calamitez. Les autres veulent dire que cette Fable tend à montrer que toute arrogance eſt odieuſe & deſagreable à Dieu, comme ainſi ſoit que s’il y a quelque choſe de bon en nous, nous le deuons tenir en foy & hommage de Dieu ſeul, & luy en rendre gloire & loüange. Car Orion picqué par le Scorpion ſuiuant le commandement des Dieux mourut, parce qu’en leur preſence il ſe vantoit n’y auoir gibier ny beſte tant fiere & cruelle fuſt elle, qui ſe peuſt ſauuer de luy. Parlons maintenant d’Arion.