Explication Phyſique deVulcan.

VVlcan eſt dit fils de l’air, d’autant que l’air extenué ſe conuertit en feu : ainſi cette fable ſignifie les mutuels changemens des Elemens. Or ſes parens le ietterent hors du ciel à cauſe de ſa deformité ; pource que le feu qui s’amaſſe és nuës, & conſte d’vne groſſe matiere, eſt auſſi groſſier & difforme au prix de celuy qui eſt placé en la plus haute & plus pure region de l’air. Thetis & les Nymphes marines le recueillirent & eſleuerent : car d’elles s’engendre la nature de la foudre & des feux celeſtes qui ſe font és nuës. On dict qu’il forgeoit les foudres de Iupiter, pource que cette vapeur de laquelle s’entaſſent les foudres, s’eſleue & s’engendre par la chaleur. Voila comment par cette fable ils enſeignoient la nature des Meteores. Cettuy-cy meſme amoureux de Minerue eſpanche en terre ſa ſemence, à cauſe que la chaleur d’en haut ne paruient pas iuſques çà bas auec ſa pureté, ains ſe peſlemeſlant auec vne plus groſſe matiere, deuient impure & auance la generation de toutes choſes.

Explication Morale.

VVlcan boiteux, mal diſpoſt de jambes, & ſans valeur, enuelopa dans vn filé Venus & Mars viſte de pieds & tres-vaillant Dieu des armes : parce qu’il n’y a force ny puiſſance qui ſoit baſtante de garantir les meſchants de la iuſte vengeance de Dieu. Et pourtant par cette traditiue ils exhortoient les hommes à integrité & innocence, & les deſtournoient de tout acte vilain.