Explication Phyſique de Pluton.

PLuton fut auſſi fils de Saturne, frere de Iupiter, Neptun & Iunon, c’eſt à ſçauoir, creé du ſouuerain Createur apres le ciel auec les autres elemens. On le prend pour la terre, & le tient-on pour Dieu des richeſſes, nourry par la paix, d’autant que la foiſon & abondance de tous biens procede de la terre entretenuë & nourrie par la paix. Il eſt auſſi Dieu des treſpaſſez, pource que tout ce qui meurt ſe reſoult en ſes principes, & retourne manifeſtement en terre. Ainſi montroient-ils que tout corps retourne en ce de quoy nature l’a faict & compoſé. Or que Pluton ſoit la terre, il ſe preuue par la fable de Proſerpine, que Pluton rauit & l’emporta ſous terre ; parce que les plantes eſtendent premierement leurs racines ſous terre, puis poulſent en haut & leur tronc & leurs branches : & pourtant Proſerpine demeure par pache faicte, partie auec Pluton, partie auec Iupiter.

Explication Morale.

PAr ces fictions ils nous exhortoient auſſi à vne tranquillité de vie, d’autant que la iouiſſance des biens de ce monde eſt de fort petite duree, veu qu’on a tant de peine à les acquerir. Dauantage ils mon- troient que celuy qui ſe veut enrichir ne doit craindre, ny vergogne, ny vilainie, ny deshonneur ; c’eſt à dire qu’il doit eſtre perfide & meſchant. Car quels ſont les rouſſins qui tirent le carroſſe de Pluton ? Alaſtor pernicieux, Orphnee obſcur, Nyctee nocturne, Æthon ardent : pource que la cruauté, l’oubliance d’equité, l’ignorance de raiſon, accompagnent ordinairement cet ardent deſir des richeſſes, ce ſont les cheuaux deſquels Pluton eſt monté.