Explication Phyſique de Cerbere.

CErbere reçoit auec careſſe les ames deualees aux Enfers : ſi puis aprés elles penſent ſortir & retourner au monde, il leur fait tant de frayeurs par ſes abois eſpouuentables qu’elles n’oſent crouler. Cela ne ſignifie rien autre que la nature des choſes qui ſe plaiſt en la naiſſance des creatures, & ſe faſche de les voir mourir. Par tels contes les Anciens ſignifioient l’immortalité des ames : car les Pythagoriciens ont enſeigné que les ames eſtoient de toute eternité, & qu’elles eſtoient tranſmiſes du ciel és corps humains comme à des Enfers : à la venuë deſquelles nature s’eſiouyt, & ſe contriſte quand elles veulent retourner aux cieux.

Explication Morale.

CErbere eſt l’auarice & cõuoitiſe des richeſſes qui les careſſe à leur venuë, mais s’afflige & ſe deult quand elle void faire des frais, fuſſent-ils neceſſaires. Il a pluſieurs teſtes : d’autant que d’vne ſeule ſource d’auarice decoulent pluſieurs meſchancetez : & nul ne peut eſtre en meſme temps auare & homme de bien ; veu que l’auarice & la probité ſe font perpetuellement la guerre.