De Promethee.

AV reſte pour montrer que toute prudence humaine contrariant à la volõte diuine eſtoit dommageable & pernicieuſe aux hommes, ils ont introduit la fable de Promethee, luy imputans l’inuẽtion de tous arts & cautelles, pour leſquels il fut griefuement chaſtié. Mais apres qu’il euſt eſté long temps garotté contre vne colonne, & enduré d’extremes tourmens, en fin Iupiter le receut en grace, pource que les gents de bien ont fort ſouuent à cõbatre les aduerſitez de ce monde, & n’y a preſque ſinon les meſchans & malauiſez qui viuent à leur aiſe & en proſperiré. Toutesfois pource que la vie humaine eſt de petite duree, celuy qui aura patiemment & ſans murmurer ſouffert beaucoup d’afflictions, trouue finalement grace enuers Dieu, & pourtant il fut en fin par ſageſſe reconcilié auec Iupiter.