PVis apres d’autant que des animaux les vns naiſſent de corruption & pourriture, les autres par conionction de maſle à femelle, ils ont expliqué ce dont les vns & les autres ont beſoing. Ceux qui s’engendrent de putrefaction, requierent vne moyenne chaleur : & vn air bening & gracieux pour ſe nourrir : auſſi ceux qui ſe procreent par copulation ont beſoing d’vn air temperé. Car puis que la ſemence ſe tire de la plus ſubtile portion du ſang, cela ne ſe fait pas aiſement ſi ſe ſang n’eſt moyennement eſchauffé ; ce qui ſe faict principalement par le moyen du primptemps : car la temperie & tiedeur du primtemps eſt comme la macquerelle de la generation. Ainſi doncques les Anciens exprimans par fables la matiere de la ſemence, & la douceur de l’air neceſſaire à ceux qui deſirent engendrer leur ſemblable, ont enſeigné que Venus eſtoit nee des parties genitales du Ciel & de la Mer : car les parties genitales du Ciel ne ſont autre choſe que cette mediocrité de chaleur par vn mouuement duiſible à la generation des animaux.