Des Heures.

DAuãtage pource qu’il ne ſembloit pas que choſe aucune ſe peuſt aſſez commodément faire par le ſeul inſtinct & conduite de nature, encore qu’il rencontre vn air bien attrempé, s’il n’eſt aidé par l’induſtrie de l’homme, les Anciens ont introduit les Heures eſpians la diligence & ſedulité d’vn chacun, & aidans de leur faueur les plus ſoigneux & diligens : car la clemence & la bonté de Dieu n’abandonne iamais l’induſtrie humaine. Et pourtant elles ont la reputation d’embroüiller le ciel de nuees, le calmer, l’eſclaircir, & gouuerner les ſaiſons. Qui plus eſt ils montroient par leſdites Heures, que la meſchanceté des hommes eſtoit ordinairement accompagnee d’vne ſterilité de terres d’vne diſette de biens, & de toutes autres calamitez enuoyees du Ciel pour leur punition.