MAis parce qu’il n’y a choſe aucune qui ſoit entierement prouffitable, veu que la plus grande partie des viandes ne tourne pas au prouffit du corps, & que toute la matiere de l’eau n’eſt pas generalement vtile pour la generation des animaux, comme ainſi ſoit qu’vne partie d’icelle viande ſe conſume en ce qui prend naiſſance, l’autre tourne en la nourriture de ce qui eſt procreé, l’autre partie s’en va en excrement ; ils ont tiltré du nom de Nymphes cette force de ſemence ou de l’eau dont ſe fait la generation, & pourtant ils ont appellé les Nymphes fruictieres & nourrices de toutes creatures, Deeſſes des paſtres, & preſidentes des prairies. Ainſi doncques ils vouloient dire qu’elles fourniſſoient de matiere propre à toutes choſes naturelles.