COnſequemment ils exhortoient les hommes au labourage, diſans que Cerés eſtoit la terre, d’où prouiennent les commoditez & richeſſes, & que le prouffit qu’on tire du reuenu d’icelle eſt treſiuſte & legitime : car le rapport de la terre vient de la clemence & bonté du ciel, & de la diligence des hommes ; c’eſt ce qu’ils ont expliqué par la fable de Cerés. Elle courut preſque tout le monde, pource qu’à cauſe de l’obliquité du Zodiaque, & du cours du Soleil au deſſous d’iceluy, l’eſté ſe fait en diuerſes ſaiſons de l’annee, ſelon la diuerſe ſituation des païs, & les bleds viennent en maturité.
Expoſition Morale.NVl ne meſpriſe impunément les Dieux, veu que les afflictions & calamitez ſont compagnes de meſchanceté ; il eſt bien force que le meſchant, profane & mal-auiſé encoure beaucoup de vergongne & deſhonneur : & pourtant il eſt beſoin que l’homme de bien ſoit deuot enuers Dieu, prudent en ſes affaires, & ſobre en la deſpenſe & conſeruation de ſes biens.