PAr la fable de Paſiphaë ils entendoient la nature de noſtre ame : car l’ame des hommes eſt femme de Minos, perſonnage treſiuſte, pource que toutes nos actions & deſſeings doiuent eſtre conioints auec raiſon ; mais dés qu’elle embraſee d’vne conuoitiſe de choſes illegitimes, ou de quelque ſale & deſhonneſte deſir ; ou que la cholere l’eſchauffe plus que de raiſon, & qu’elle ſe deſuoye de ladite raiſon : c’eſt alors qu’on dit qu’elle commet adultere, & s’accouple auec vn taureau, duquel elle enfante vn monſtre : car celuy qui met vne fois à nonchaloir l’equité, & profane les loix, il eſt fort mal-aiſé de le contenir puis apres dans les barrieres de iuſtice. Ainſi doncques l’ame inique adherant à tels vices engendre diuers & pernicieux monſtres.