De Medee.

ILs ont auſſi faict Medee fille du Soleil, parce que la nature d’vn air bien aſſaiſonné peut beaucoup, laquelle prouient de la clemence du Soleil. Car les mœurs & les mouuemens de l’eſprit ſuiuent volontiers le temperament du corps. Comme ainſi ſoit que Medee ſignifie conſeil fille d’Idye, c’eſt à dire de connoiſſance, elle conſent auec la force des Eſtoilles, & les faict auſſi deualler du ciel ; d’autant qu’il n’eſt pas raiſonnable de qualifier vn homme ſage, s’il ne ſçait dominer ſur les aſtres qui ont quelque pouuoir ſur les concupiſcences de la chair, & s’il ne ſçait commander ſoy-meſme. Il eſt donc expedient à l’homme ſage qu’il arreſte le cours de ſes conuoitiſes, & faſſe pluſieurs choſes que le commun peuple admirera. Mais celuy qui s’en ſera fuy pour adherer à ſes plaiſirs & voluptez, & aura trahy ſa patrie, ſes parens & alliez, comment eſt-il poſſible que tout à coup il ne ſente de tres-griefues miſeres auec la perte de tous ſes moyens ? Voila comme les Anciens nous apprennent à eſtre ſages, & que tous meſchans hommes ſont miſerables.