LEs Anciens ont eſté ſi curieux de faire connoiſtre aux hommes, que la liberalité & reconnoiſſance des biens receus ou faits eſt tant agreable à Dieu, qu’ils ont bien voulu dire que Iupiter auoit placé entre les eſtoilles la Cheure qui l’auoit allaitté, & le nauire d’Argo, pour auoir ramené tant de braues Seigneurs ſains & ſaufs chez eux. Ils diſent que cette galiotte fut faite par le conſeil & l’ordonnance de Pallas ; pour montrer que toute largeſſe & liberalité, fondee pour le moins en raiſon, eſt agreable à Dieu, & fort à loüer, combien que celle qui ſe fait auſſi par cas d’auenture, ou pluſtoſt par vn inſtinct de nature que par iugement, n’eſt pas à reprendre.