De Siſyphe.

PVis-aprés pour reprimer le babil des cauſeurs, ils ont enſeigné que Dieu venge toute iniquité, puniſſant ceux auſſi qui ne gardent telle foy & loyauté qu’ils doiuent aux Magiſtrats & Princes qui les ont eſtablis en honneur ; car il ne leur eſt pas bien ſeant de diuulguer les ſecrets de leurs Seigneurs. Toutefois cet enſeignement ne conuient pas moins à ceux qui briguent & pourchaſſent de toute leur affection des Eſtats & Offices, qui neantmoins bien ſouuent leur ſont refuſez, leſquels apprennent par cette Fable, qu’il n’y a choſe qui plus afflige l’homme que l’ambition. Cela ſe peut auſſi rapporter à toutes autres vacations & qualitez, pource que quand quelqu’vn a acquis ce qu’auparauant il auoit en admiration, il vient à s’ennuyer, & en rechercher quelque autre.