LA Fable des Titans a eſté feinte non pour façonner les mœurs, mais pour expliquer les affaires de Nature : Ils prindrent les armes à l’encontre de Iupiter, & furent par luy precipitez en l’abyſme du tartare ; d’autant que les corps naturels ſubiets à corruption font mine de ſe vouloir parangonner à ces corps celeſtes ſempiternels, combien que toutefois ils viennent incontinent à defaillir, encore que chaque forme d’animaux ſoit eternelle. Ils ont doncques qualifié ces formes ou Titans du tiltre de Peres des Dieux & des hommes, & ſource de toutes creatures ayans ame. Quelques-vns ont eſtimé que Titan ſoit le Soleil, comme de faict les Poëtes prennent ſouuent ces deux noms en meſme ſignification. Les autres prennent les Titans pour les plus groſſiers elemens qui par la vertu des corps ſuperieurs ſont continuellement chaſſez çà bas.