ILs ne ſe ſont pas contentez de nous propoſer vn exemple ſeul pour nous inuiter à pieté & crainte de Dieu, ains pour ce faire nous ont mis deuant les yeux diuers ſupplices aſſignez à pluſieurs perſonnes pour auoir contemné le ſeruice de leurs Dieux. Ainſi le Cyclope pour auoir nazardé Iupiter, eut ſon œil vnique creué par Vlyſſe ; & le Sanglier de Calydon gaſta l’Ætolie à cauſe du meſpris de la Majeſté de Diane faict par le Roy Oenee. Et comme c’eſt choſe certaine qu’il n’aduient aucune aduerſité ſinon par le conſeil & la prouidence de Dieu ; auſſi rien n’eſchet de ſemblable que par la meſchanceté des hommes ; car les pechez attirent l’affliction.