Des Harpies.

CE n’eſt pas ſeulement par la Fable de Typhon que les Anciens ſe ſont mis en deuoir d’expliquer la force des vents, mais auſſi par celles des Harpyes : car tout ainſi que par les Naïades & autres Nymphes ils ont ſignifié la nature des riuieres, des fontaines, & des pluyes, par Iupiter, le feu elementaire & la plus haute partie de l’air, par Neptun, l’eau par Veſte, la terre ; par Iunon, la plus baſſe partie de l’air : auſſi par les Harpyes ils ont entendu la violence & la nature des vents ; car elles ont eſté filles de Thaumas, & ſœurs d’Iris, d’autant que les pluyes, les nuës & les vents ſe font d’vne meſme matiere, à ſçauoir des vapeurs eſleuees en haut par les rayons du Soleil.

Expoſition ethique.

DAuantage ils nous ont appris par cette feinte, que Dieu tranſmet au cœur des perſonnes ce monſtre d’auarice & conuoitiſe de biens, comme le plus grief & plus bourrelant ſupplice qu’il leur puiſſe enuoyer ; car il faut par neceſſité que l’auaricieux ſoit cruel ou à ſoy-meſme, ou à ſon prochain, d’autant que pour entaſſer quantité de threſors & acquerir force heritages, il ne fait point de conſcience d’outrager autruy, ou bien il ſe ſouſtrait à ſoy-meſme ſes neceſſitez. Et pourquoy fut aueuglé Phinee, auquel les Harpyes rauiſſoient la viande qu’on ſeruoit deuant luy ? pource qu’il ne conſideroit pas que la condition de la vie humaine eſt reſerree de bornes tres eſtroittes, & ſe doit contenter de peu : ce qu’auſſi ſe confirme par la forme des Harpyes.