De Theſee.

D’Autre part voulans montrer la qualité des difficultez & trauaux qui enuironnent cette vie, leſquelles perſonne ne pourra ſurmonter s’il n’eſt renforcé de bons & fermes enſeignemens de ſageſſe ; ils ont donné la reputation à Theſee d’auoir defait & mis à mort pluſieurs brigands & tres-cruels tyrans, & deſcouuert les fraudes du labyrinthe, car le labyrinthe repreſentoit la vie humaine embroüillee d’vne infinité de meſaduentures & perplexitez, l’vne deſquelles en traine touſiours quand & ſoy de plus faſcheuſes, dont perſonne ne ſe peut dépreſter que par vne ſinguliere prudence, valeur & conſtance. L’ambition, auarice & volupté charnelle cauſent ces difficultez & autres forfaits, eſquels ſi quelqu’vn s’embarraſſe vne fois, il n’en trouuera que mal-aiſément l’iſſuë, & les plus mal-auiſez ſe fourrans en ce labyrinthe de conuoitiſes, meurent là dedans premier que de s’en pouuoir deſueloper : la luxure de Teree eſt vne ſuffiſante preuue des ordures & pauuretez que la volupté engendre.