ET pour montrer les damnables effects de l’auarice, & qu’il n’y a place ſi forte que les corruptions & largeſſes n’y trouuent entree, ils ont feint que du ciel il tumba de l’or dans le giron de Danaé pour la ſuborner contre l’ordonnance de ſon pere. Depuis elle enfanta Perſee, qui mit à mort Meduſe, comme nous auons dit, lequel n’eſt autre choſe que la raiſon, qui chaſſe bien loing toutes voluptez illegitimes. Ce que toutesfois il n’exploita pas ſans la faueur diuine, pource que nul n’eſt homme de bien, ſi cela ne luy vient de Dieu, duquel nous deuons ſans intermiſſion implorer l’aſſiſtance.