De Neree.

ET pour montrer que la prudence eſt requiſe & neceſſaire en toutes choſes, mais ſur tout és nauigations, à cauſe des dãgers qu’encourent ceux qui voyagent ſur mer, ils ont dict que Neree, c’eſt à dire, l’experience & adreſſe de nauiger, eſtoit fils de l’Ocean & de Tethys, lequel Neree, d’autant que c’eſt le deuoir du ſage de s’accommoder à beaucoup de rencontres, eſtoit couſtumier de ſe changer en diuerſes formes. Afin donc que perſonne ne ſe cuidaſt ſouffrir naufrage ou perir pluſtoſt par vne diſgrace de Dieu, que par ſa propre ignorance, ils ont forgé ceſte fabuloſité touchant Neree & les Nereïdes. Car il n’eſt pas queſtion de blaſmer la bonté de Dieu quand par ſon imprudence & temerité quelqu’vn s’eſt expoſé à des dangers deſquels il ne ſe peut ſauuer, veu que Dieu ne donne ſecours qu’aux ſages & diligens, lors que les moyens & les forces humaines leur defaillent.