ET pour abreger, les Anciens ont enſeigné cette maxime qu’Ariſtote eſcrit en ſes Ethiques, que la vertu tient le milieu entre les deux extremitez, deſquelles l’vne & l’autre eſt vicieuſe. Car comme ainſi ſoit que les Nauchers ayent à fuyr d’vn coſté l’eſcueil de Scylle, & de l’autre celuy de Charybdis, tres-dangereux monſtres en la coſte de Sicile, & qu’il faille paſſer entre-deux, celuy ſe ſauue d’eux qui ne decline non plus vers l’vn que vers l’autre. Et la vie humaine eſtant comme vne longue nauigation en laquelle ſe preſente ſans ceſſe vne infinité de difficultez, & d’allechemens de diuers monſtres, il ne faut ceder, ny aux trauerſes, ny aux attraits, ains moderer les vns & les autres : ioint que la vie de l’homme ne peut ſouffrir, ny vne continuelle ſeuerité, ny vne continuelle molleſſe.