L’Exemple de Penelope ſeruoit pour exciter les Dames, & generalement toutes autres femmes à continence & chaſteté, à patience en leurs afflictions, à la conſeruation de leur famille & meſnage, & prudence en tous affaires : laquelle pour cette cauſe eſt dicte femme d’Vlyſſe, c’eſt à dire de raiſon ; car il eſt beaucoup plus malaiſé de vaincre vn courage bien muny de temperance & d’autres vertus, ou l’induire à quelque acte deſhonneſte, que de prendre la ville de Troye, & pourtant ils feignent que cette ville là ſouſtint le ſiege l’eſpace de dix ans, & que Penelope ne pût eſtre gagnee l’eſpace de vingt annees. Ainſi doncques les Anciens l’ont honoree de pluſieurs loüanges comme vn ſingulier exemple de toutes vertus, auquel les Dames doiuent conformer leur vie : laquelle par pluſieurs artifices & vaines promeſſes trompa fort induſtrieuſement tous ceux qui luy faiſoient l’amour ; n’eſtant en ſa puiſſance de leur donner congé, ny mettre hors de ſa maiſon, encore qu’elle l’euſt bien deſiré.