D’Vlyſſe.

AV demeurant ils ont introduit Vlyſſe cõme vne image ou pourtraict auquel on peuſt voir les perturbations de la vie humaine : car comme ainſi ſoit qu’elle eſt d’vn coſté circuïe de difficultez & trauaux : & de l’autre aſſaillie des voluptez & ioyes de ce monde, comme nous auons dict au diſcours de Scylle, il faut faire eſtat que celuy ſeul eſt ſage qui peut à ſon hõneur ſe depeſtrer des vns & des autres. Ainſi doncques par les fictions d’Vlyſſe ils vouloient ſignifier qu’il falloit ſagement & auec quelque moderation de courage ſupporter tant la proſperité que l’aduerſité, tant les faſcheries que les plaiſirs de cette vie mortelle.