De la Chimere.

MAis par la fabuloſité de la Chimere ils ont principalement entendu la nature des riuieres & torrens, qui au moyen des pluies & de l’abondance des eaux en hiuer, coulent d’vn cours preſque perpetuel & violent, & reſemblent à des lions indomptables & non capables de bride. Et d’autant qu’ils minent & rongent tout ce qui leur eſt voiſin, on les accompare à des cheures qui touſiours broutent ; mais pource que leurs canaulx ſont ordinairement ſinueux & reflechis, on dit qu’ils ont le derriere de ſerpens. Bellerophon monté ſur le Pegaſe mit à mort ce monſtre, d’autant que la chaleur du Soleil ne permet pas qu’en Eſté tombe ſi grande quantité d’eaux ; à cauſe que les torrens ſe deſſechent.

Expoſition Morale.

PAr ceſte meſme fable ils nous vouloient deſtourner de la cholere, le plus ſale monſtre qui ſoit, car elle rend furieux ceux qui ſe laiſſent emporter à ſon ardeur ; & borde les yeux d’vne couleur rouge & comme flamboyante : c’eſt pourquoy l’on dit que la Chimere iet- toit des flammes de feu. Or il n’y a vice plus nuiſible ou à l’honneur, ou à la vie des hommes, ou à leurs biens, que la cholere, qui renuerſe toutes choſes en vn inſtant, ſi la raiſon n’attiedit & ne modere ſes bouïllons, & ne deuons pas moins nous abſenter de la compagnie de ceux qui ſont trop enclins à tel vice, que de celle des plus venimeux ſerpens.