De Rhee.
LEs Anciens ont eſcrit pluſieurs choſes de Rhee & des ceremonies obſeruees és Sacrifices d’icelle, pour exprimer la nature de la terre. Or Rhee eſt la force de la terre qui paſſe en la generation des choſes de ce mõde : les courroyes garnies de fer & de cuiure auec leſquelles ils frappoyent ſur vne roüe bruyante, ſignifioient que les vents, les pluies, la greſle, & toutes autres choſes qui cheent du ciel la heurtent de tous coſtez. Ils ont dit qu’elle cheminoit à trauers l’air ſans pancher plus d’vn coſté que d’autre : & pour cet effect eſtoit portee ſur vn chariot, ayant ſur la teſte vne couronne tourrillee, pource que la terre eſt de ſa propre nature ſuſpenduë en l’air, ſans eſtre aucunement eſtançonnee. Ils l’ont appellee mere de tous les Dieux, dautant que (cõme nous auons dict) elle eſt le ſiege & fondement de tout corps naturels, en laquelle & de laquelle s’engendrent toutes ſortes d’animaux : & femme de Saturne, c’eſt à dire du temps, pource que les mutations des elemens ne ſe font qu’auec le temps, & de ces reuolutiõs prouiennent pluſieurs choſes deſquelles le tẽps eſt pere ; pour leſquelles auancer la nature des vẽts peut beaucoup, leſquels ſont miniſtres de chaud & de froid, qui ſeruent grandement pour la production & l’accroiſſement des choſes naturelles.