De Ganymede.

TOus les Anciens s’accordent en ce poinct, que Iupiter ayma Ganymede ; mais perſonne de ceux dont les eſcrits ſont paruenus à noſtre ſiecle, n’allegue aucune raiſon probable de ſon fabuleux rauiſſement au Ciel. I’eſtime quant à moy que par cette Fable ils ont voulu dire, que l’homme ſage & de bon conſeil approche fort prés de la nature des Dieux immortels. Car le nom meſme de Ganymede ſignifie vn homme de bon conſeil, que Dieu rauit à ſoy à cauſe de ſa ſinguliere prudence, au lieu que les fols & les mal-auiſez ne ſont vtiles ny à eux ny à leur prochain. Ils diſent que Ganymede fut tres-beau iouuenceau, pource que l’ame du ſage n’eſt que bien peu ſoüillee des pollutions humaines : laquelle eſtant telle, eſt aiſément emportee vers Iupiter.