A l’amicu pueta Antone Bonifacio.

« - Cum'ellu soffia u ventu in lu tragone !

L’acqua chi casca annant'â sciappa mughje.

U me' mulinu pare una prighjone.

L'anima spavintata da qui fughje.

Eju scunsulatu mi ne sto stasera

Solu in lu timpurale scatinatu

Biata Santa Maria, a me' prighera.

A Te chi bona sè par ogni natu !

Tu sai che becchju so', e la me' fronte

Porta li solchi d’una vita dura.

Ma simile a la punta d'un gran monte

L'anima meja sempre ristô pura.

S’avissi da cuntà li mesi e l’anni

Chi u Celu m’ha cuncessù di campà,

Cume sullevu a tutti i me' malanni

Solu u travagliu pudaria cità.

In lu mulinu cume me in ruvina

Quant’è n'aghju scarcatu sacchi e zani !

E quand’ella vulava la farina,

Aghjune fattu, ohimé, prugetti e piani !

Un lume stava accesu in la me' vita.

Sole e forza mi dava. Oramai,

Spent’è la luce e la gioja è finita,

E i me' cumpagni avà so’ li me' guai.

U me' figliolu è mortu, e le campane

Sunatu hanu a mortoriu lu me' dolu.

Biata Santa Maria, so’ tre simane.

Ch’eju piengu notte e ghjomu e chi so’ solu.

E di ch'un possu mancu, a u campusantu,

Lagnammi, ind’ellu dorme, a bassa voce.

Un vegu par racoglie lu me' piantu,

Ne tarra rumigata e mica croce.

Avemu tutti, a u campu di u riposu,

Un cantu chi di fossa sirbarà ;

Ma annant’â soja, di maghju luminosu.

U fior di mucchju mai un cascarà.

Cum'ellu deve soffre u me' figlliolu,

Suppillitu culà duv'ellu è mortu.

Fangu e neve so' forse u so' linzolu.

Biata Santa Maria, dammi cunfortu !

Fa ch'elIa cessi l’acqua, u freddu, e fa

Ch'e' un senti più lu ventu in li castagni.

Mi si scioppa lu core di pinsà

Chi la timpesta è piena d'i so' lagni.

M'ha dettu, u merru, u nome di a furesta

Duve una palla li tagliô la vita.

Ma un mi ricordu più ; solu mi resta

ln capu e in core un’angoscia infinita.

Partî cume tant’altri u dui aostu,

Dopu la messa detta di bon’ora.

L’aria pura era dolce cume u mostu,

E lu paese sanu stava fora.

Quand’ellu junse qui, u me' bel gigliu

Guardô, senza parlà, li nostri guai.

Una lagrima vidi a lu so' cigliu.

E strintu in le me braccie lu pigliai.

« Mamma prega par me in Paradisu,

Curaggiu, disse, o bà. Lasciami andà.

Ti tengu caru e mi ne vo dicisu.

Dammi un basgiu dinô ; addiu, o bà. »

E po' s’alluntanô, marchjendu pianu.

U fogu si lagnava a mezza ziglia.

E si n’andô par sempre ind’elle vanu

E cose chi u Signore ci ripiglia. - »