Lingua Corsa

A Paulu Arrighi

A chi ghjova di scrive in lingua côrsa ?

Chi pudarîa capilla un la sa leghje.

A centu si tu vanti la so' forza,

Par statti à sente unu s'arreghje.

 

Ma si tu dici dopu ch’ella è dolce

Cume un calà di sole in la furesta,

O cume un cantu tristu à bassa voce,

Allora in giru a te piu nimu resta.

 

Di parlà côrsu ormai s'è persu l'usu.

So' dighjà morte tante cose care !

E, duva andati so' la rocca e u fusu

Si n'andarà la lingua à ciô chi pare.

 

Una razza, chi voli, è cume un sassu :

Di quandu in quandu un pezzu si ne va,

E, ghjunta l'ora poi, senza fracassu,

A capu inghjô si mette à vultulà.

 

E noi semu in falata in ogni cosa.

Nati in li monti stemu in la pianura.

Megliu ca in altu in bassu si riposa.

Pocu importa si l'aria è menu pura.

 

So' stati dicapati i nostri pini,

Torti li fiumi e zappunati li monti ;

Ma peghju avemu vistu quandu i spini

Si so' calati inseme cu li fronti.

 

Usi spariti e tradizione morte

So' stati, senza pientu, suppilliti,

E sarrate par sempre so' le porte

Di le tombe in le quale stanu uniti.

 

A croce di ste tombe è rughjinosa,

E, a sera, à l'apparî di a prima stella,

Annant'â u tettu rottu urla, stizzosa,

A bianca e maladetta malacella.

 

E tu chi spessu, à u chjar di luna, vai

Solu a pusà vicinu a u campusantu,

In le notte d'istate hai intesu mai

Sorte d'â tarra un prulungatu piantu ?

 

Empie le valle, e vigne e i campi intornu,

Si sparghje pa le coste, incroscia u fiore

Di lagrime chi so', ad altu jornu,

Perle d'arghjentu à u luce di u sole.

 

I nostri antichi pace eterna un n’hanu.

A tarra chi li copre un n’è più quella

Chi dava prima frutti, e aqua e granu

A la razza chi more e chi fu bella.

PETRU LECA.