Madame, si vous voulez considerer de sain entendement, le commencement de mon amitié, la continuation d’icelle, puis le dernier poinct où elle est

maintenant reduite, je m’asseure que mettant la main sur vostre conscience, vous vous accuserez vous-mesmes, non seulement de l’ancienne rigueur que m’avez toujours monstrée : mais sur tout, de ceste nouvelle ingratitude, de laquelle vous m’usez à ceste heure, n’estant contente de vous estre baignée au malheur de mes peines passées, si par nouvelle recharge, vous fuyez ma presence, comme celle de vostre ennemy mortel ; en quoy j’experimente, que le ciel & toutes les influences demandent ma ruine, & je la leur accorde : car ma vie ne prenant vigueur, & n’estant soustenue que de la faveur de voz divines graces, ne peut estre maintenue une seule minute de jour, sans le liberal secours de vostre douceur & vertu : vous suppliant, que si les affectueuses prieres d’aucun mortel tourmenté eurent jamais force & puissance de vous esmouvoir à pitié, qu’il vous plaise avec grand merveille, tirer doresnavant ceste mienne pauvre ame, miserablement affligée de mort ou de martire. Celuy qui est plus vostre que sien. Edouard le désolé Roy d’Angleterre.