qu’à voz anciens merites : mais selon vostre modestie & bonté accoustumée, vous rejetterez la faute sur la puissance de l’amour, laquelle m’a tellement aliené ma liberté, & offusqué le meilleur de moy, que sortant maintenant hors des loix d’honneur & de raison, je me sens gehéné & forcé en mon ame, vous faire telle requeste, & ne pouvant chasser le venin mortifere hors de mon cœur, qui a aneanty mes forces, & empoisonné mon sens, & privé mon ame de tout bon conseil, je ne scay que faire, que me retirer vers vous, n’ayant repos aucun, sinon quand je la voy, je parle d’elle, ou pense en elle, & suis maintenant reduit en si piteux estat, que ne l’ayant peu vaincre par prieres, offres, presens, humilitez, ambassades & lettres, mon seul & dernier refuge & port asseuré de mes maux, est en vous, en la mort, ou en ma force.