Entré suis en melencollye
D’amours et de leur doulce vie,
Car jamais en nulle saison
Ne veis que gens ayans raison
Comme dames et chevaliers,
Jolys clers et beaux escuyers,
Fillettes moult bien gracieuses
[A2v] Et pucellettes amoureuses,
Remplis de responces et beaulx ditz:
Par eulx ne sont point nulz lais ditz;
En eulx est toute courtoisie,
Toute doulceur sans villennie,
En acomplissant leur advis
Par leurs beaulx regardz et doulx ris,
Car doulx regard et ris joyeulx
Sont aux amantz delicieux.
Mais il fault tout premierement
Que ce soit faict celeement,
Car vray amant perd bien sa mye
Par faulx rapport et plains d’envye
Qui envenime et qui embouche
Par jalousie et male bouche,
Tant qu’il convient par desconfort
Aux vrays amantz souffrir la mort.
Pourtant supplie au dieu d’Amours
Qu’il confonde tous faulx jaloux,
Tous envieulx, tous mesdisans
Qui vont sur amantz mesdisans
Et leur font souffrir trop d’ennuytz
Par leur faulx parler jours et nuytz.
Aux vrays amantz face secours
Et leur doint ioye de leurs amours,
[A3r] Car sans ce vivre ne pourroit
Nul vray amant qui aymeroit
Dames de cueur loyallement
Sans penser en mal nullement.
Amours les vrays amantz faict vivre
Par l’esperance qu’i leur livre,
Car l’esperance les conforte
Et le vray talent leur apporte
De leurs cueurs à martyre offrir.
Esperance les faict souffrir
Les maulx dont on ne scet le compte
Pour la joye qui les surmonte,
Si vouldroye doresnavant
Le dieu d’Amours entierement
Craindre, servir, aymer, querir,
Honnerer, doubter, requerir,
Qu’il me vueille joye donner
De mes amours et consoler,
Car point n’a soubz le firmament
Plus belle ne plus advenant
Qu’est celle en qui j’ay mon cueur mis.
À la servir me suis submis
Comme à elle bien appartient,
En elle tout bien se contient,
Tout honneur et toute beaulté;
[A3v] Loyalle en cueur, en feaulté.
Les cheveulx blondeletz et longz
Aussi doulcette que coulons,
Fronc reluysant, sourcilz voultiz,
Les yeulx luysantz, beaulx et petis.
Elle a les joues vermeillettes
Et si a riante bouchette,
Tres bien faict par bonne mesure,
Elle est assez grand par mesure:
Je ne sçauroye en nulle terre
De plus beau corps de femme querre.
Quant d’elle bien je me remembre
De la façon de chascun membre,
Je croy que soubz le firmament
On ne sçauroit aucunement
Trouver plus belle et gratieuse;
En tous ses faictz elle est joyeuse
Plus que nulle qui soit au monde,
En elle trestout bien habonde,
Haulte dame est et honnoree,
De toute noblesse paree.
Elle est niepce de mon seignour:
Prier ne l’oseroye d’amour
De paour que ne soye esconduyt,