[B4v] Dame. Devers vous suis venu
Pour entendre le contenu
De tout ce qu’avez à plaisir.
Comment
[B5r] Doulx, gratieulx, bien advenant
Comme l’on dit communement,
Dont je loue Dieu et mercy,
Si avez moult bien desservy
D’avoir en ung hault lieu amye.
Ma dame, certes je n’ay mye
Encore à ce mise mon entente.
Chevalier, certes longue attente
Vous pourroit nuyre à mon advis.
Se me croyez vous serez mis
En ung hault lieu, se vous voulez,
Où vous serez tres bien aymez:
Je le vous dy en bonne foy.
Ma dame, je ne sçay pourquoy
Le me dictes, ne que ce monte,
Car je ne suis ne duc ne conte
Qui si haultement aymer doye,
Ne je ne suis point homs qui doye
Dame avoir si tres souveraine.
Se vous y eussiez mise peine
Bien eussiez eue ma pareille:
[B5v] Il advient bien plus grand merveille,
Et telles viendront bien encores.
Or escoutez en brief parolles:
Se je vous ay m’amour donnee,
Qui suis haulte dame honnoree,
Seriez vous pas bien esbahy?
Certes, ma chere dame, ouy!
Bien je vouldroye vostre amour
Avoir, pour bien et pour honnour.
Mais Dieu de faulce amour me gard,
Et que je n’ayme nulle part
Où la honte mon seigneur gise,
Car à nul feur n’en nulle guise
Je ne prendroys nulle achoyson
Que de faire telle mesprison
Envers mon seigneur natural:
Tousjours luy veulx estre loyal,
Jesus m’en gard le filz Marie.
E dea! musard qui vous en prie!
Vuydez tantost appertement
Et vous en allez vistement,
Car vous estes faulx chevalier.
[B6r] Dame, mercy je vous requier:
Point ne le disoye pour mal.
Traystre vous estes et desloyal!
Allez hors de ma compaignie:
Vous ne pensez qu’à villennie,
Dont je suis fort desconfortee.
Mais devant qu’i soit la nuictee
Serez en vostre cueur marry:
Dire le voys à mon mary;
Bien je sçay, quant il le sçaura,
En son cueur courroucé sera
Quant me verra ainsi troublee.
Comment
[bois]