[D6r] La Duchesse

Pas je ne doibs estre joyeuse

Quant de moy vous vous deffiez:

Vostre secret vous me deubsiez

Dire plus tost qu’à nul vivant.

Jamais nul jour de mon vivant

Ne vous vouluz desdire en rien,

Mais maintenant je congnois bien

Que vous ne m’aymez nullement.

Quant vous et moy premierement

Fusmes espousez à l’eglise,

M’aviez vous par la foy promise,

Et moy à vous de la tenir

Et loyaulment la maintenir.

Vous sçaviez bien, mon amy cher,

Que Dieu nous mist en une chair

Et si nous assembla en une;

Par le droit de la loy commune,

Nul ne peult en une chair estre

Fors ung seul cueur en la senestre.

Comme doncques c’est le cueur nostre,

Le mien avez et j’ai le vostre.

Rien ne doibt doncque au vostre avoir

Que le mien ne doibve sçavoir.

Pour ce vous pry que me le dictes

Et envers moy ne contredictes.

[D6v] Jamais joye au cueur n’auray

Jusques à tant que le sçauray.

Se dire ne me le; voulez

Bien sçauray que point ne m’aymez:

Jamais ne vous decellay chose

Qui dedans mon cueur fust enclose.

Je laissé pour vous pere et mere,

Oncles, parens et seur et frere,

Dont j’ay faict ung tres mauvais change

Quant envers moy vous trouve estrange.

Autreffoys m’avez esprouvee,

M’avez vous en faulte trouvee?

Certes pas bien vous ne gardez,

Envers moy ne contregardez

Vostre foy, dont suis bien dolente

En mon cueur et fort desplaisante.

Trop grandement me mesprisez

Quant vostre secret ne m’osez

Dire, moy qui suis vostre femme.

Je vous jure Dieu et mon ame:

Pas bien ne tenez vostre foy

Quant vous vous meffiez de moy.

Je vous pry amyablement

Que vous me deissiez hardiment