Combien qu’entre toutes les creatures de Dieu, il ne se trouve rien plus traictable & humain, que les femmes : de sorte qu’il semble qu’elles soient envoiées du ciel, pour le soulagement de nostre humanité. Si est-ce que depuis qu’elles degenerent de leur naturel, & que leur collere s’allume et s’enflamme, elles deviennent quelque fois furieuses, & entreprennent des choses, que les plus cruels tyrans auroient horreur d’ex-

ercer : dequoy nous font preuve une infinité d’histoires sacrées & prophanes, depuis le commencement du monde jusques à nostre siecle. Mais qui a esté mieulx acomply en toutes choses qu’Adam ? La femme, du premier assault l’a vaincu. Qui a esté plus fort que Samson ? La femme a dompté sa force. Qui a esté plus chaste que Loth ? La femme a esté victorieuse de sa chasteté. Qui a esté plus religieux que David ? La femme a troublé sa saincteté. Qui a esté plus sage que Salomon ? La femme l’a faict devenir fol. Qui a esté plus fervent en la foy que sainct Pierre, premier Apostre de Jesuchrist ? Une simple chambriere l’a faict trembler, & renoncer son maistre. Qui a esté plus patient en toutes choses que Job, lequel le diable mesme, ne peut retirer de sa simplicité ? Et toutesfois la femme le feist murmurer, & maudire. Qui a il de plus reveré que le siege Papal ? Toutesfois la femme, par son astuce, y a monté. Bref, il ne se trouve rien si difficile, ardu, & penible, ou sa malice ne penetre, lors qu’elle la veult deployer : Comme vous pourrez juger par la lecture de ceste histoire, où les affections d’une femme cruelle sont si bien exprimées, que vous ne serez moins espouventez de les entendre, qu’elle estoit hardie et asseurée à les executer.