A TRESILLUSTRE, ET TRESVERTUEUSE PRINCESSE, MA DAME Jeanne de Foix, Royne de Navarre, Claude Gruget, son treshumble serviture, desir salut & felicité. JE NE ME fusse ingeré, ma dame, vous presenter ce livre des nouvelles de la feuë Royne vostre mere, si la premiere edition n'eust obmis ou celé son nom, & quasi changé toute sa forme, tellement que plusieurs le mescognoissoient : Cause, que pour le rendre digne de son auteur, aussi tost qu'il fut divulgué, je recueilly de toutes parts les exemplaires, que j'en peu recouvrer, escrits à la main, les verifiant sur ma copie : & feis en sorte, que je le reduysy au vray ordre qu'elle l'avoit dressé. Puis sous la permission du Roy, & vostre consentement, il a esté mis sur la presse, pour le publier tel qu'il doit estre. En quoy me revient en memoire, ce que le Comte Baltazar dict de Boccace, en la preface de son Courtisan, que, qu'il en feit en se joüant, scavoir est son Decameron, luy a porté plus d'honneur, que toutes ses autres œuvres Latines, ou Tuscanes, qu'il estimoit les plus serieuses. Aussi la Royne, vray ornement de nostre siecle (de laquelle vous ne forlignez, en l'amour & cognoissance des bonnes lettres) en se jouänt sur les actes de la vie humaine, a laissé si belles instructions, qu'il n'y a celuy, qui n'y trouve matiere d'eru