Transcription Transcription des fichiers de la notice - <em>Mythologie</em>, Paris, 1627 - III, 04 : Du Cocyte Conti, Natale 1627 chargé d'édition/chercheur Équipe Mythologia Projet Mythologia (CRIMEL, URCA ; IUF) ; projet EMAN, Thalim (CNRS-ENS-Sorbonne Nouvelle) PARIS
http://eman-archives.org
1627 Fiche : Projet Mythologia (CRIMEL, URCA ; IUF) ; projet EMAN, Thalim (CNRS-ENS-Sorbonne Nouvelle). Licence Creative Commons Attribution – Partage à l’Identique 3.0 (CC BY-SA 3.0 FR)
Paris (France), BnF, NUMM-117380 - J-1943 (1-2)
Français

D Cocythe.

CHAPITRE IV.

SELON les Fables anciennes il falloit que les ames des defuncts trauerſaſſent auſſi le Cocyte, deuant qu’arriuer aux Enfers. Platon au Phædon declare où cette riuiere paſſe, & d’où elle prend ſa ſource : Cette riuiere abordant la, ſe renforçant fort d’vne telle eau, & ſe fourrant ſous terre par pluſieurs tours & deſtours, et tournoyemens , chemine d’vn cours oppoſé à celuy de Pyriphlegeton, et le vient rencontrer au marez d’Acheruſe. Son eau ne ſe meſle point auec aucune autre : mais en tournoyant ſe jette dans le Tartare à l’oppoſite de Pyriphlegethon. Il ſe nomme, ſelon les Poëtes, Cocyte. Metamorphoſe de la Nymphe Menthe, & de ſon frere baſtard.Les Anciens content que la Nymphe Menthe, aſſez belle, fut fille de Cocyte, laquelle Proſerpine ſurprit vne fois couchee auec Pluton ; mais elle diſſimula ſon mal-talent iuſques à ce que Pluton fuſt abſent. Puis après l’auoir bien rudement tancee, elle la tranſforma en l’herbe appellee Menthe. Ce qui aduint prés de Pyle, ſur vne montagne qui depuis retint le nom de cette meſme herbe. Elle auoit auſſi vn frere baſtard, qui ſçachant bien le faict, & y conſentant, ou de crainte, ou de la reuerence qu’il portoit à Pluton, fut pareillement conuerty en vne herbe champeſtre & ſauuage, qui reſſemble fort à la Menthe en odeur & facon. Homere en l’onzieſme de l’Odyſſee, dit que Cocyte & Pyriphlegeton entrent dans l’Acheron, & que Cocyte eſt comme vn ruiſſeau de Styx :

Cocyte iſſant du Styx, & Pyriphlegeton,Agrandiſſent les flots du fleuue d’Acheron.

Voila preſque tout ce qui ſe trouue de Cocyte : cherchõs-en la verité.

Expoſition morale du Cocyte.Cocyte en ſon etymologie ſignifie plaintes, & lamentations, comme teſmoigne Platon au 3. de ſa Republique ; parce que la pluſpart de ceux qui ſont prés du dernier ſouſpir, ſe repentans des maux qu’ils peuuent auoir faicts, iettent des ſouſpirs, des ſanglots, & des gemiſſements funeſtes, pour auoir commis contre la loy de Dieu, pere tres-benin de toutes creatures. Les autres ſouſtiennent qu’il a eſté ainſi nommé, parce qu’ils ſe pleignent grandement, & leur faſche fort de quitter ce qu’ils ayment le mieux : les autres, à cauſe des pleurs & gemiſſements que iettent les parens & amis des defuncts, veulent que cette riuiere ait ainſi éſté nommee, laquelle il falloit que tous les morts paſſaſſent. Et perſonne ne peut deſcendre aux Enfers que par leſdictes riuieres, ou (pour mieux dire) par telles effroyables penſees & apprehenſions, que les Anciens ont repreſentees en telle ſorte que nous enſeignans par telles feintiſes à viure en ce monde, nous n’apprehendiſſions point les tourmens des Enfers lors qu’il le nous faudroit abandonner. Il faut maintenant deſchifrer le Naucher des Enfers.