Du Tartare.

CHAPITRE XII.

APRES que les ames des meſchans ſoüillees de pluſieurs enormes vices, ont eſté par tortures & queſtions examinees par les Iuges, & qu’ils ont eu ſuffiſante preuue & connoiſſance de leurs forfaits, pour auoir aux deſpens & dommages de beaucoup de gens veſcu au milieu de toutes voluptez & delices, pour auoir eſté traitres à leur patrie, pour auoir à force d’argent trompé beaucoup de perſonnes, pour auoir par auarice abandonné, ou leurs amis, ou les gens de bien, ou leurs parens, ou leurs bienfaicteurs ; pour auoir par corruptions & preſens negligé la Religion & ſeruice de Dieu, on les met entre les mains des Furies pour les trainer au Tartare, lieu des tourmens, où l’on ne void goutte, & d’où l’on ne ſort iamais. Tous afferment que ce Tartare eſt vn lieu bien antique : & Ariſtophane, Poëte Comique croid qu’il ait eſté de meſme aage que la Nuict, & cette confuſe matiere du monde, diſant en ſa comedie tiltree les oyſeaux :

Tout eſtoit vn chaos, vn noir Erebe ; & nuict,Vn Tartare profond : là Terre eſtoit encoreConfuſe en cet amas, ſans Ciel, ſans Air, ſans Aure.

Il ſemble qu’Eſiode Theogonie croye que le Tartare ſoit né de cette maſſe confuſe qu’on appelloit Chaos :

Premierement naſquit le Chaos ; puis aprésLa terre aux larges-flancs, pour domicil’ exprésDes ſouuerains qui font ſur l’Olympe leur erre ;Puis le Tartare obſcur enfonſé ſous la terre.

Il y auoit vne grande diſtance entre la terre & le Tartare, & autant que la terre eſt eſloignee du ciel, autant penſoit-on que le Tartare le fuſt de la terre, comme l’exprime ledit Poëte :

Le Tartare eſt autant deſſous terre abyſmé,Comme ſ’eſpand en long la diſtance & l’eſpaceDu ciel haut eſleué iuſqu’en la terre baſſe.Car ſ’on abat du ciel vne enclume de fer,A peine pourra-elle en terre deualerDans le dixieſme iour ſi de terre on la ietteDans le profond Tartare il faudra qu’elle metteIuſqu’au dixieſme iour deuant qu’y aborder.Des gros barreaux de fer viennent ſon fort border,Qu’vne nuict à trois rangs encerne obſcure & ſombre,Lieu propre à contenir de maint treſpaſſé l’ombre.

Que ce Tartare ſoit vn lieu tres-obſcur, Homere le nous enſeigne au 8. de l’Iliade :

Ou bien ie le prendray pour le precipiterIuſques ſous le plus creux de ce manoir terribleQue l’on nomme Tartare, où eſt le gouffre horrible,Et le profond Abyſme ayant portes de fer :Lieu autant enfoncé ſous terre & dans l’enfer,Comme ſ’eſpand en long la diſtance et l’eſpaceDu ciel hault eſleué iuſqu’en la terre baſſe.

Et que ce lieu-cy, & l’Erebe & le Chaos ſoient l’endroit où les meſchans ſont en perpetuels tourmens, l’autheur du Dialogue nommé Axioche le declare : Ceux qui toute leur vie n’ont ceſſé de mal-verſer & commettre des meſchancetez, les Furies les trainent au Tartare , en l’Erebe & au Chaos, où eſt la demeure des peruers & reprouuez et les cruches à eau des Danaides, qu’elles ne peuuent iamais remplir, et la ſoif de Tantale qu’il ne peut eſtancher. Platon au Phædon prenant le Tartare pour le lieu meſme qu’Homere appelle Barathre, qu’il cuide eſtre preſque au centre & milieu de la terre, d’où & où toutes les eaux coulent : vers la fin du Dialogue de la Rhetorique l’appelle Priſon des meſchans s: Ceux qu’on trouvera auoir iniuſtement & ſans crainte de Dieu veſcu, vont en vne priſon de punition & iuſte ſupplice, qu’on appelle Tartare. C’eſt auſſi là qu’on tenoit les ames enchaiſnees ; teſmoin Æſchyle au Promethee.

Car ſ’il m’euſt enfondré deſſous terre és enfersAu Tartare ſans fond, de cordes & de fersIl m’euſt encheueſtré d’vne lieüre fermeEn ce manoir fumeux qui les ames enferme.

¶Mythologie du Tartare.Voila ce qui ſe trouue touchant le Tartare. Voyons maintenant ce qu’il y a de caché là deſſous. Quelques Anciens ont creu que le Tartare fuſt vn lieu ſous les deux piuots du monde, comme diſoit Cratés, tant à cauſe de la rigueur du froid, qu’à cauſe auſſi de la longueur des tenebres qui y ſont. Mais ie croy qu’ils ſe ſont trompez ; d’autant que ceux qui habitẽt ſous l’Equateur ou cercle equinoctial, ont leurs nuicts beaucoup plus eſpaiſſes & tenebreuſes que ceux qui ſont prés des piuots. Car combien que ceux qui ſont ſous le piuot Arctique ou Septentrional, ayent ſix mois continuels de nuict, pendant que le Soleil paſſe les ſignes de Midy, depuis le commencement de la Liure ou Balance iuſques à la fin des Poiſſons : toutesfois ce n’eſt pas vne nuict ſi ſombre, que l’on n’y puiſſe bien lire : & pourtant il n’y a pas beaucoup d’apparence d’appeller ce lieu Tartare à cauſe de ſon obſcurité. I’en croirois pluſtoſt Zezés, qui tient que le Tartare ſoit vn embraſement ſouſterrain, d’autant que ſ’engendrent là des vapeurs, d’où procedent des clameurs & bruits incertains, & des tremblemẽs, dont le nom de Tartare eſt venu ; parce qu’il y a là beaucoup de troubles & perturbations, que les Grecs nomment Taraches. Toutesfois il ne faut pas penſer que ce lieu-là ait eſté ainſi nommé pour eſtre ſeul où telles choſes auiennent ; car il y en a d’autres de meſme effect, qui ſelon leur diuerſe ſituation obtiennent diuers noms, quand telle choſe ſe fait en haut, c’eſt l’Æther ; quand elle ſe fait ſous terre, c’eſt le Tartare. Mais que dirons-nous que c’eſt que le Tartare, où les morts ſont emmenez, & d’où l’on ne reuient iamais ? La terre meſme, ſous laquelle les corps ſont enſeuelis, qui tumbans vne fois en cette perpetuelle priſon, n’en peuuent iamais releuer, qu’au dernier iour. On dit qu’il y a des lacs en ce lieu qui regorgent de gros boüillons de feu ; d’autres auſſi tout glacez, dans leſquels les ames des meſchans ſont les vnes apres les autres noyees par le Demon, comme dit Plutaque au traitté de la tardiſue vengeance de Dieu. Les lieux ſouſterrains fremiſſans & boüillonnans en feu à cauſe de beaucoup de vapeurs qui ſ’amaſſent ſous la terre, ont faict croire ce que deſſus. Telles choſes donc furent inuentees pour tenir le monde, en ceruelle, & eſtourner les hommes de mal : & ſi on l’euſt ainſi creu, il y euſt eu en toutes ſaiſons peu de meſchans, peu de meurtriers & d’aſſaſſins, peu de voleurs & brigands. Et pleuſt à Dieu qu’auiourd’ huy ceux meſmement qui ſe diſent imitateurs de Ieſus-Chriſt, adiouſtaſſent foy, non aux Fables, non aux vaines & friuoles inuentions & feintiſes des Poëtes, mais bien à noſtre Seigneur Ieſus-Chriſt ſeul verittable, ſeul ſage, ſeul autheur de tous biens. Si on l’eſcoutoit lors qu’il menace les meſchans de ſupplices & damnation eternelle, qui ſe pariureroit ? qui voleroit ? qui outrageroit ſon frere & prochain, ou vn homme de bien ? qui le tromperoit ? qui ſeroit l’homme ſi ſot, ſi ignorant & ſi deteſttable qui oſaſt ſans apprehſenſion quelconque iuger les differends d’autruy, ſ’il croyoit qu’il a vn iour à rendre compte des iugemens & ſentences qu’il aura donnees ? Et d’autant qu’on n’adiouſte aucune creance, ny aux paroles des Anciens, ny à la doctrine meſme de Ieſus-Chriſt, cela eſt cauſe que tout eſt remply de fraudes, de trahiſons, de querelles, de procez, de pariuremens. Et quant aux iugemens, l’authorité & credit d’vn riche homme y a plus de puiſſance que les loix, ou humaines, ou diuines. Mais en fin les peruers periront miſerablement. Voila quant au Tartare : diſons deſormais des autres Miniſtres d’Enfer : & premierement de la Nuict.