Dieux Penates quels, & quel leur office.OR incontinent que les enfans eſtoient nais, apres que Lucine y auoit faict ce qui eſtoit de ſa charge, les Dieux Penates en prenoient la protection, ſuiuant la creance des Anciens. Mais deuant que paſſer outre, il faut ſçauoir quels ils eſtoient, & qu’elle eſtoit leur function. Quelques-vns doncques ont eſtimé les Penates eſtre ceux par le moyen de qui nous reſpirons, cognoiſſons, viuons, & voyons le Soleil ; c’eſt à ſçauoir Iupin, Iunon, Minerue, & Veſte : laquelle ils mettent auſſi du conte, car ils ont dit que Iupiter eſtoit le milieu, Iunon le plus bas, Minerue la plus haute partie de l’air, qui eſt la force & vertu diuine de l’intelligence ; & Veſte, la terre. Ils les ont qualifié & creu eſtre Dieux particuliers de chaſque pays, Dieux familiers, preſidens ſur les villes, & gardes tutelaires de chaſque maiſon priuee, comme le montre Ciceron en ſon Plaidoyé pour ſa maiſon : Et vous qui ſur tous autres m’auez redemandé & r'appellé, pour la demeure & retraitte deſquels i'entreprens ce Plaidoyé, Penates du pays & familiers, qui eſtes commis & gardiens de cette ville & republique. Et Denys d’Halycarnaſſe au premier liure de ſes Antiquitez : Les Romains appellent tels Dieux Penates : & quelques-vns tranſlatans leur nom en Grec, les nomment Dieux du pays ; les autres genitaux, les autres, domeſtiques et familiers ; les autres, commis ſur les heritages, les autres, ſecrets. Mais pourquoy eſtoient-ils Dieux du pays pluſtoſt que communs à chaſque ville & maiſon ? Pource qu’ils croioyent que non ſeulement chaſque ville, mais auſſi chaſque logis, voire meſme chaſque habitant, & iuſques aux beſtes & plantes euſſent certains Dieux particuliers qui les prenoient en leur defenſe & ſauue-garde.Etymologie de leur nom. Quant à l’etymologie & origine de leur nom, on la tire du mot penus, qui ſignifie toute prouiſion & viures neceſſaires pour la nourriture de l’homme : ou de penitus, c’eſt à dire, bien auant en dedans ; dont les Poëtes les nomment auſſi Penetrales comme logez au dedans. Autres deduiſent leur denomination de mots ſignifians, nais chez nous.Leur ſacrifice. Somme, les Penates eſtoient Dieux familiers, auſquels on offroit en ſacrifice du vin & de l’encens, croyans que ce fuſſent ceux chez qui nous naiſſons. Autre opinion touchant les Penates.Toutefois les autres tenoient que les Penates eſtoient Apollon & Neptune qui baſtirent les murailles de Troye, & Veſte, adorez par les Samothraciens auec beaucoup de reuerence : deſquels Dardanus tranſporta les images en Phrygie, & Ænee en Italie aprés la deſtruction de ſa ville ; ſelon que Virgile l’exprime au 2. de l’Æneide, où Hector apparoiſſant en ſonge à Ænee, les luy recommande comme il s’enſuit :

–Troye ſes joyaux ſaints Et ſes Dieux familiers recommande en tes mains, De tes deſtins, pren les pour compagnons fideles, Et leur cerche ſoigneux des murailles nouuelles, Qu'en fin tu fonderas, ayant long temps erré ſur les flots ineſgaux du Royaume azuré. Ce dit, du plus ſecret de la maiſon ſacree Les ſaints bandeaux, le feu d’eternelle duree, Et la puiſſante Veſte il emporte en ſes mains.

¶Expoſitiõ des contes ſuſ-dits.Si l’on conſidere de prés ce myſtere, l’on trouuera que ces Dieux Penates ne ſont autre choſe que les élemens meſmes chez qui nous ſommes nez. Car ceux qui ont mis Apollon & Neptune entre les Penates, n’ont-ils pas nommé de noms diuins les deux principes & commencemens de toute generation, veu que toutes choſes naiſſent de l'humeur, comme eſtant la matiere ; & de la chaleur qui ſert d’ouurier pour la mettre en beſongne & luy donner forme ? car és choſes de ce monde l’humeur tient place de femelle ; & la chaleur, de maſle. A bon droit leur donnent-ils Veſte pour compagne, comme fondement pour eſpaiſſir & donner accroiſſement au corps qui s’engendre. Ceux qui font les élemens autheurs de la generation, & tiennent que les eſprits tirent du ciel leur force & vigueur, ont (ce ſemble) eſté de meſme aduis, comme auſſi ceux qui prennent pour Penates Iupiter, Iunon, Minerue & Veſte. Quelques-vns ont repreſenté les Penates en forme de deux ieunes garçons aſſis, tenans de coſté & d’autre vne pelote ; leſquels n’ont pas cuidé qu’ils fuſſent autre choſe que la particuliere fortune & éuenement d’vn chaſcun, puis qu’ils naiſſoient chez nous. Ils les ont nommez grands Dieux, bons & puiſſans, croyans qu’ils euſſent toute puiſſance & ſeigneurie ſur la vie humaine.Images des Penates. On penſoit que les images de ces Dieux, qui eſtoient és maiſons des Roys ou Princes & Seigneurs des villes & places, euſſent la garde & conſeruation generalement de tout ce qui eſtoit de la ville : & que celles qui eſtoient chez les particuliers : joint qu’on croyoit que tout cet Vniuers fuſt conduit & conſerué par ie ne ſçay qu’elle ſuitte & ordonnance fatale, qu’on a auſſi nommé Genie : & pourtant diſcourons-en conſequemment.