D’Endymion.

CHAPITRE IX.

Genealogie d’Endymion.ENDYMION fut fils d’Æthlie & de Calice. Pauſanias és premieres Eliaques eſcrit qu’il fut mignon de la Lune, & dit-on qu’il eut d’elle cinquante enfans : toutefois aucuns ne luy donnent que trois fils, Peon, Epee, Etole, & vne fille Eurydice d’Aſterodie, ou de Chromie, ou d’Hyperippe. Il eut encore vne autre fille, Piſe, qui donna nom à la region de Piſe d’Olympe. Ætole auſſi donna nom à l’Ætolie, qui auparauãt ſe nommoit Hianthis, comme dit Demarate au 1. liure des noms changez des prouinces & places : combien que les autres le facent fils de la Mort, les autres de Mars. Quelques-vns luy donnent encore d’autres fils, Pithir, & Elee qu’il eut d’Eurydice, qui regna ſur les Epeens, leſquels de ſon nom il nomma Eleens : & diſent qu’il fut petit fils de Iupiter, attendu qu’Æthlie eſtoit fils de Iupiter & de Protogenie, lequel obtint de luy cette grace ſpeciale & priuilege de pouuoir viure & mourir quand bon luy ſembleroit, comme teſmoignent Heſiode, Aceſilas, Piſandre, Pherecyde, & Nicandre au 2. liure de l’hiſtoire d’Ætolie, & Theopompe és Epopees. D’auantage on dit que Iupiter le receut au Ciel ; & que comme il ſe mit vne fois en deuoir de forcer Iunon, il le trompa luy en preſentant l’idole ou fantoſme ſeulement, & l’enuoya aux Enfers. Aucuns diſent qu’Endymion fut Roy d’Elide, & que par la iuſtice qu’il exerçoit dignement, il fut mis au nombre & rang des Dieux, & impetra de Iupiter de dormir eternellement. D’autres eſcriuent qu’il a eſté Lacedemonien. On dit qu’il ſe retiroit ordinairement dans vne grotte à Lame, montagne de Carie, où eſtoit la ville d’Heraclee, comme eſcrit Nicandre au 2. liure de l’Europe : & que la Lune auoit accouſtumé de deſcendre en cette grotte, & coucher auec luy. Ce qu’Ouide touche comme en paſſant en l’Epiſtre de Leandre :

Vueille toy ſouuenir de cette chere roche En laquelle tu fis vne amoureuſe approche Vers toy Endymion, quand ton cœur en fut pris. Il ne veut que rudeſſe aigriſſe tes eſpris.

Toutesfois Ciceron au 1. liure des diſputes Tuſculanes dit que ce perpetuel dormeur d’Endymion, tant aymé de la Lune en Latme montagne de Carye, receut ſeulement quelques baiſers d’elle, & qu il ne ſe reſueilla iamais, de ſorte qu’il y dort encores ; autant en dit Lucian au Dialogue de Venus & de la Lune. Theocrite eſtime Endymion bien-heureux de ce qu’il dort ſans ceſſe, & ne ſent aucun mal ny faſcherie, diſant en ſa 3. Eclogue :

I’enuie grandement d’Endymion le ſomme, Qu’vn dormir continu loing des penſers aſſomme.

C’eſt pourquoy les Poëtes le qualifient dormeur de Latme. Voila ce que content les Fables touchant Endymion.

¶Expoſiitõ de la Fable d’Endymion.Voyons maintenant ce qui a meu les Anciens à nous faire de ſi beaux contes. Premierement il faut ſçauoir que les Anciens ont inuenté & forgé beaucoup de choſes pour recommander à iamais la memoire des perſonnages illuſtres ; leſquelles habillees de veſtemens fabuleux, on a depuis accommodé au proffit & inſtruction de la vie humaine. Ainſi tout ce que les Poëtes ont chanté touchant Endymion, ç’a eſté pour le rendre recommandable à toute la poſterité. Mais ceux qui expoſent cecy au plus prés de l’hiſtoire, diſent qu’il eut le bruit de s’eſtre endormy en cette montagne, & d’eſtre aymé de la Lune, d’autant que le iour il dormoit, & la nuict, à l’heure que tout gibier ſort de ſon giſte, taſniere & forme, chaſſoit à la clarté de la Lune, & ne ſe montroit point de iour. Les autres diſent qu’il s’appliqua le premier à la contemplation des corps celeſtes : & la Lune a donné ſujet à cette Fable, à cauſe de tant de changemens qu’elle a, & en ſa lumiere & en ſa forme, laquelle il eſtoit ſur tout curieux de connoiſtre : & s’addonnant de nuict à telles conſiderations, il ne repoſoit point, mais dormoit le iour. Lucian en ſon Aſtrologie teſmoigne qu’il donna le premier aux hommes la connoiſſance de l’eſtat & qualité de la Lune, comme auſſi Phaëton deſcouurit le cours du Soleil. Voila pourquoy il eut le bruit d’eſtre aux bonnes graces de la Lune, teſmoin Pline au 2. liure. D’autres toutefois ont dit qu’Endymion eſtoit vn pareſſeux, & vn gros dormeur ; de là eſt venu le prouerbe cõtre ceux qui ſont ainſi lourds, peſans & endormis, deſquels on dit, qu’ils dorment vn ſommeil d’Endymion : & conuient à ceux qui vont ſi lachement en beſongne, qu’ils ſemblent dormir touſiours. Mais il ne faut pas trouuer eſtrange s’ils ont appellé pareſſeux & voluptueux Endymion, homme bien entendu en l’Aſtronomie, & tres-ſoigneux à rechercher les cours des aſtres ; veu qu’Enee meſme, que quelques vns loüangent ſi hautement, eſt par Apollon tancé comme vn yurogne, glorieux & vanteur au 20. de l’Iliade :

Æné chef des Troyens, où ſont ces vaillantiſes, Ces valeureux exploits que par belles vantiſes Tu promettois parmy tant de preux cheualiers, Verſant du bon Bacchus les doux fruits autonniers ?

Ie ſçay bien que d’aucuns eſtiment Endymion auoir eſté vn berger, qui prenoit plaiſir à mener paiſtre ſes brebis à la fraiſcheur de la nuict, au lieu que les autres paſtres tenoient leurs trouppeaux enfermez és eſttables & bergeries : & parce que les ſiens engraiſſoient à veuë d’œil, on fit vne Fable, que la Lune eſpriſe de ſon amour faiſoit cette grace & faueur au trouppeau d’Endymion. Les Eleens ſe ſont vantez qu’il eſtoit mort & enſeuely en leur pays, & luy ont dreſſé vn beau & magnifique ſepulchre. Or tout cecy ne nous apprend autre choſe ſinon que la diligence eſt requiſe & neceſſaire en toutes choſes, veu que Dieu ayde volontiers à ceux qui ne ſont point laſches ny pareſſeux en leur deuoir, & qui ont leur recours à luy, l’inuoquans humblement ; car certes Dieu n’ayme ny ne fauoriſe les nonchalans. Mais laiſſons Endymion, diſcourons de la Fortune.