Des ieux Nemeens.

CHAPITRE IIII.

Inſtitution des ieux Nemeens.LES ieux de Nemee ſe celebroient dans vne foreſt ainſi nommee, ſiſe entre Phlius & Cleone villes d’Achaie, à l’honneur d’Archemore, autrement Ophelte, fils de Lycurge, pource qu’il fut en cette meſme foreſt mordu par vn ſerpent, dont il mourut. Aucuns content ainſi le faict. Qu’Oedipe ayant par meſgarde eſpousé ſa mere vefue de Laius Roy de Thebes, il eut d’elle deux fils, Eteocle & Polynice, leſquels le pere, deſpoüillé volontairement de ſa Royauté, inſtalla en ſon Royaume à telle condition, qu’ils regneroient l’vn apres l’autre chacun ſon annee. Mais Eteocle, auquel comme a l’aiſné, Polynice auoit cedé la couronne pour la premiere annee, faiſant refus de laiſſer iouïr ſon frere de ſon droict ; ce puiſné ſe retira deuers Adraſte Roy d’Argos, qui luy donna ſa fille Argie en mariage, & leuant le plus de force qu’il put, fit la guerre aux Thebains auec ſon autre gendre Tydee. L’iſſuë de cette guerre fut telle, que les deux freres ſe battans en eſtoccade, s’entretuerent, & meſme leurs corps eſtans poſez ſur vn bucher pour eſtre ſelon l’ancienne couſtume reduits en cendres, la flamme ſe mypartit comme teſmoignant que la haine irreconciliable d’entre ces deux freres viuans ne pouuoit finir meſme par leur decez. Or entre les trouppes enuoyees par Adraſte au ſecours de Polynice, il y eut ſept Capitaines, leſquels arriuez en Lemnos de Thrace, ſaiſis de grand ſoif rencontrerent Hipſipyle femme Lemnienne, qui portoit Ophelte fils de Lycurge (miniſtre & preſtre de Iupiter) & d’Eurydice, laquelle prians de leur vouloir enſeigner de l’eau à boire comme ſçachant le pays, elle pour s’acheminer plus à deliure, craignant toutefois de coucher l’enfant à terre, à cauſe de l’oracle qui auoit expreſſément defendu de ce faire premier qu’il ſceuſt cheminer ; le mit à crud ſur vne grosse plante d’Ache prés vne fontaine où repairoit vn Serpent, qui s’entortillant autour du col d’iceluy, l’eſtouffa cependant qu’elle s’eſtoit auancee pour leur puiſer de l’eau. Ces Capitaines venus à ſi piteux ſpectacle, tuerent le Serpent : & pour conſoler le pere ordonnerent qu’on feroit tous les trois ans vn ieu funebre à l’honneur de ſon fils. Auquel du commencement les genſdarmes ſeuls, ou fils de genſdarmes tenoient le champ : mais en ſuitte chacun y fut receu. Voyez liure 4. chap. 13.Theagene en l’hiſtoire d’Ægine dit que cette femme s’enfuit de Lemnos en Nemee, pource que les femmes Lemniennes auoyent reſolu de faire mourir tous leurs maris & les maſles ; & ce pour vne ialouſie, d’autant qu’à l’inſtigation de Venus courroucee contre elles, ils auoient eu à faire à d’autres femmes. Et de faict les eſgorgerent tous, horſmis Hipſipyle qui ſauua ſon pere Thoas l’enfermant dans vne huche. Ce qu’eſtant deſcouuert aprés le deſpart des Argonautes, qui ſur ces entrefaittes eſtoient abordez en l’iſle, elles le ietterent dans la mer ainſi enclos qu’il eſtoit, & la condamnerent à mourir. Hipſipyle oyant cette ſentence donnee contre elle, s’enfuit ; & priſe en chemin par des corſaires fut venduë à Lycurge. Comme doncques Eurydice femme de Lycurge voulut faire mourir Hipſipyle pour la perte de ſon enfant, elle ſe cacha en vn lieu à l’eſcart ; & ſes deux fils, Thoas & Eunœe, la cerchans s’addreſſerent au deuin Amphiaraus, qui la leur decela : tellement que par leur moyen & par l’aſſiſtance des Capitaines ſuſdits elle eut ſa grace. Ache herbe funebre.Or y auoit-il en ces combats meſmes esbatemens qu’és autres : mais les vainqueurs eſtoient couronnez d’Ache, herbe funebre, && ce pour perpetuer la memoire d’Archemore. Les autres veulent dire qu’Hercule inſtitua ces ieux-cy pour auoir en tel endroict tué le Lion de Nemee qui deſoloit tout le païs. Aucuns maintiennent que ce fut à cauſe d’Ophelte, qui par ſa propre mort preſagit l’iſſuë qu’auroient les Lacedemoniens faiſans la guerre aux Thebains. Autres eſcriuent que ce fut pour l’amour non de cet Ophelte, mais d’vn autre de meſme nom, fils d’Euphetas & de Creuſe, qui fut picqué par vn ſerpent tandis que ſa nourriſſe alloit montrer de l’eau à ces Capitaines qui l’en auoyent requis. Les ieux Nemeens furent donc inſtituez pour la conſolation de Lycurge, d’Eurydice & d’Hipſipyle : & les Iuges y preſidens eſtoient veſtus d’habillemens de dueil. Car Ophelte fut depuis nommé Archemore, pource que dés ſa natiuité Amphiaraüs luy auoit predit ſa mort, car arché ſignifie commencement, & móros, mort : comme celuy qui dés le commencement de ſon eſtre deuoit prendre fin. Iadis les vainqueurs y eſtoient courõnés d’Oliuier : mais depuis cette grãde deffaite que les Medes firẽt, on cõmmenca de les guirlander d’Ache, herbe de dueil, en l’honneur des morts en cette bataille. Or depuis ceſte inſtitution il ne fut loiſible de porter chapeaux d’Ache en aucun feſtin, cõme non conuenables aux feſtes publiques, ains pluſtoſt au dueil & tristeſſe. Ces combats furẽt appellez Nemeens d’vn mot ſignifiant paiſtre, pource que les aumailles conſacrees à Iunon Argiue paiſſoient en cette meſme foreſt. Les autres dient qu’il y auoit vers Argos vne cõtree dicte Nemee, où les aumailles de Iupiter & de la Lune paſturoient. Quelquesvns veulent que ce ſoit à cauſe des filles de Danaé, entre leſquelles cela fut egalement partagé. Car ceux qui preſidoient en ces ieux eſtoient d’Argos, de Corinte & de Cleone. Luciã au dialogue des exercices fait mẽtion des prix qu’on propoſoit en chaque ieu qui ſe faiſoit en tels tournois : Es Olympiques (dit il) on donnoit aux vainqueurs vn chappeau d’Oliuier ; es Iſthmiens, de Pin ; és Nemeens, d’Ache ; et és Pythiens on donnoit des pommes conſacrees à Apollon. Quant à l’Ache, ce n’eſt pas ſans ſubjet qu’on l’eſtimoit propre & conuenable à telles iouſtes, pource qu’aucuns ſe ſont faict à croire qu’elle naſquit du ſang de l’enfant tué par le Serpent : ce qui contrarie au dire de ceux leſquels eſcriuent l’enfant auoir eſté poſé par Hipſipyle ſus vne plante d’Ache : car ſuiuant cette opinion l’Ache eſtoit deſia & nee & cõnuë. Aucuns dient que les ieux de Nemee furent eſtablis en memoire & ſouuenance d’Archemore ; mais que depuis Hercule les remit en meilleure forme aprés la deffaitte du Lion Nemeen, & les conſacra à Iupiter, ordonnant qu’on les ſolemniſeroit tous les trois ans au douzieſme iour du mois, que les Corinthiens appelloient Panemos, & les Atheniens Boëdromios, qui correſpond à noſtre mois d’Aouſt : pource qu’en ce mois Theſee auoit heureuſement combatu & defaict les Amazones : & dés lors on y conſtitua des Iuges Candiots. Paſſons maintenant aux Iſthmiens.