De la Cheure Celeſte.

CHAPITRE XII.

VOICY vn bon teſmoignage de ce que ie viens de dire en ce qu’ils ont mis cette Cheure au rang des Eſtoilles, pour le bien-faict que Iupiter en auoit receu, veu quelle l’auoit nourry de ſon laict : & Voyez le 1. cha. du 2 liure &Iupiter meſme pour en eterniſer la memoire ſouloit porter ſa peau, dont il faiſoit tant d’eſtat qu’il s’en voulut ſeruir de rondache ; & pour cette raiſon il fut appellé Ægioche. Quelques-vns ont nommé cette nourrice de Iupiter, Nymphe Amalthee. Les autres ont eſtimé que ç’ait eſté vne femme d’Arcadie, nommee Aix, c’eſt à dire Cheure : qui eſtant accouchee de deux gemeaux, les mit en nourrice pour allaitter Iupiter : & pource qu’elle auoit nom Cheure, ſes enfans furent appellez Cheureaux. Or d’autant qu’ils auoient quitté la mammelle de leur mere pour la laiſſer tetter à Iupin, ils eurent auſſi place entre les aſtres, & ſont logez à la main droite du Chartier, ou Picque-bœuf. Arat les appelle Eſtoilles du Chartier, au leuer deſquels auient le plus ſouuent quelque tempeſte. Ceux de Phlius au reſſort d’Argos, adoroient auec beaucoup d’honneur ce ſigne celeſte, & auoient dreſſé ſon image en plein marché preſque toute doree : comme le teſmoigne Pauſanias en l’Eſtat de Corinthe : ce qu’ils faiſoient pour vne opinion qu’ils auoient, que la ſaiſon de cette Cheure faiſoit beaucoup de dommage aux vignes, & pour l’auoir propice & fauorable ils luy ordonnerent vn ſeruice diuin. Cela aueint le Soleil eſtant au ſigne du Lion, car en telle ſaiſon les vignes ſont en grand’peine, faute d’eau, ce qui ſe fait plus ou moins, ſelon les lieux où elles ſont ſituees. Nous auons cy-deſſus expoſé le ſuject qui fit donner place entre les eſtoilles à cette Cheure : c’eſt à ſçauoir, que Iupiter ne voulut point eſtre trouué ingrat ny oublieux des bien-faits qu’il auoit receus, meſmes à l’endroit d’vne Cheure. On l’appelle Cheure d’Olene, à cauſe d’vne ville d’Achaïe, où Iupiter la tetta, à laquelle Olene, fils de Iupiter, & d’Anaxithee fit depuis porter ſon nom. Mais il y a de l’apparence que ce n’a pas eſté vne Cheure : ains vne femme, parce qu’Amalthee fut femme de Nyctee, fils de Neptun & de Celene fille d’Atlas, de laquelle il eut deux filles, Antiope & Nyctimene, Liure 5. ch. du 4. Nyctimene inceſtueuſe. conuertie en Cheueſche.deſquelles la derniere eſpriſe d’vn sale & vilain amour de ſon pere coucha auec luy, par l’aide & entremiſe de ſa nourrice, ce que le pere ayant deſcouuert, la voulut tuer, mais par la miſericorde de Pallas elle fut conuertie en Cheueſche. Pluſieurs autres animaux, voire (comme i’ay deſia dict) choſes inani- mees, ont eſté receus au nombre des ſignes celeſtesLiure 2. chap. 8. Liure 8. chap. 13. Liure 8. chap. 24. Liure 5. chap. 8. & liu. 6. chap. 21. Liure 7. chap. 14. ; comme le Dauphin, pour auoir perſuadé Amphitrite d’eſpouſer Neptun : ou bien pour auoir ſauué Arion de Methymne : le Scorpion qui picqua le pied d’Orion, dont il mourut : le Taureau qui fit à Iupiter vn ſeruice tant ſignalé que de luy porter Europe à trauers la mer iuſques en Candie : l’Aſne & la Creche de Silene : la lyre d’Orphee : & autres qu’on pourra remarquer en la lecture de ces diſcours.