Transcription Transcription des fichiers de la notice - <em>Mythologie</em>, Paris, 1627 - VI, 21 : Des Titans Conti, Natale 1627 chargé d'édition/chercheur Équipe Mythologia Projet Mythologia (CRIMEL, URCA ; IUF) ; projet EMAN, Thalim (CNRS-ENS-Sorbonne Nouvelle) PARIS
http://eman-archives.org
1627 Images : Münchener DigitalisierungsZentrum (MDZ).
Paris (France), BnF, NUMM-117380 - J-1943 (1-2)
Français

Des Titans.

CHAPITRE XXI.

Origine des Titãs.LES Titans qui firent la guerre à Iupiter, & furent à grands nome coups de foudre precipitez aux Enfers, naſquirent du Ciel & de la Terre. Ils leuerent les armes contre luy, parce que deuant Saturne, Ophion & Eurynome fille de l’Ocean (qui furent appellez Titans) auoient commandement & ſeigneurie ſur les Dieux. Mais Saturne ayant cõbatu & defait Ophion, & Rhee vaincu Eurynome, ils les debouta de leur dignité, & s’en inueſtit. Pache faite entre Saturne & les Titans.Toutefois les autres diſent que Titan eſtoit frere aiſné de Saturne, & que comme aiſné, l’Empire luy appartenoit par droict de ſucceſſion : neantmoins à la requeſte de Veſte leur mere, d’Ops & Cerés leurs ſœurs, Saturne obtint la domination du Ciel, à laquelle les Titans meſmes ſe souſmirent : mais à telle condition qu’il feroit mourir tous les fils qui naiſtroient de ſon eſtoc, afin qu’apres la mort de Saturne la Courone reuinſt aux hoirs des Titans. Or Iupiter ayant eſté contre les articles de la capitulation, ſecrettement eſleué, & s’eſtant ſaiſi du Royaume paternel, Titan & ſes enfans prindrent les armes, & luy denoncerent la guerre, comme regnant contre la compoſition reciproquement faite entre leurs peres. Mais Iupiter auerty par Themis de s’affubler & couurir de la peau de la cheure Amalthee, d’autant qu’elle leur donneroit l’eſpouuente, defit les Titans en bataille, en laquelle il acquit beaucoup de reputation. Autel logé parmy les Eſtoilles.Il faut noter que deuant qu’entreprendre cette guerre par Iupiter, il obligea les autres Dieux par ſerment fait ſur l’Autel, qu’en luy donnant eſcorte ils luy garderoient foy & loyauté ; & pourtant cet Autel fut depuis placé parmy les les Eſtoilles, comme dit l’interprete d’Arat ſuiuant l’auis d’Eratoſthene, diſant : Eratoſthene dit que cet Autel eſt celuy meſme ſur lequel les Dieux firent leur premier ſerment lors que Iupiter commença de marcher contre les Titans, forgé par les Cyclopes. Principaux chefs des Titãs.Entre les autres Titans il y auoit Promethee, Crie, Pallas, Anyt, Ægæon Centimain (autrement dit Briaree) & Gyges, qui toutefois, ſelon le teſmoignage d’Ion en ſes Dithyrambes, ne fit point la guerre à Iupiter, ains fut par Thetis appellé hors de la mer, & commis pour Archer de la garde du corps de Iupiter. Auſſi-dit-on qu’il eſtoit fils de la Mer & de la Terre. Les autres eſtiment qu’il ait eſté l’vn des Geans, non des Titans, & que du commencement il fut bien de la coniuration & de la ligue des Geans, mais que depuis il s’enfuit d’Eubœe en Phrygie, où il mourut en fin. Eumele, ancien Poëte Grec, auoit eſcrit cette guerre des Titans contre les Dieux en beaux vers heroïques. Le bruit eſt qu’ils furẽt les premiers auſquels Cerés apprit à ſejer les bleds, teſmoin Apolloine au 4. liure. Animaux venimeux iſſus du ſang des Titans.Or du ſang ſorty des playes qu’ils receurent en cette bataille, iſſit grand’quantité de viperes, de ſerpens, araignes & autres animaux venimeux, ſelon le teſmoignage de Nicandre en ſes Theriaques. Aprés leur defaite on fit des ieux Olympiques en l’honneur de Iupiter, pour eterniſer la memoire de ſa victoire, qui furent inſtituez par Hercule Ideen : eſquels entre autres Apollon gagna Mercure à la courſe, & Mars vainquit à l’eſcrime des coups de poing, & depuis la couſtume demeura de chanter des airs de poëſie au ſon des inſtrumens de Muſique à l’honneur des Cinquerclons (qui auoiẽt emporté le prix des iouſtes) tandis qu’ils dançoient ; d’autant que telle eſpece de vers eſtoient ſacrez à Apollon, qui auoit obtenu la premiere victoire és ieux Olympiques. Voila ce que nous auions à dire pour le preſent touchant les Titans ; il en faut tirer quelque proffit.

Mythologie hiſtorique.Les Egyptiens ont eſcrit en leurs hiſtoires, que les Titans, fils du Ciel eſtoient quarante-cinq de compte faict, qu’il auoit eus de pluſieurs femmes, notamment de Titee, dixſept. Et combien que chacun euſt ſon nom particulier, ſi furent-ils tous en general nommez par leur mere Titans. Laquelle ayant eſté femme ſage, vertueuſe & liberale, obtint par ſes bien-faits, tel honneur qu’on le rendoit aux Dieux, & fut apres ſa mort dicte Terre. Enfans iſſus du mariage d’Hyperion & de Rhee.Elle auoit pluſieurs filles, deſquelles l’aiſnee fut dite Rhee & Roine. Cette-cy nourrit & eſleua ſes freres, deſquels elle en eſpouſa l’vn, Hyperion, & de ce mariage iſſirent deux enfans, fils & fille, le fils pour ſa beauté fut nommé Soleil, la fille Lune. Noyez par leurs Oncles, & le pere eſtranglé.Les autres freres de Rhee craignans de n’auoir plus de part ny de portion au Royaume, font vne damnable ligue enſemble, conſpirans d’eſtrangler Hyperion, & noyer dans l’Eridan (le Pau) ſon Soleil encore petit enfant. Ce qu’ayans executé de faict : Lune de dueil qu’elle en eut, ſe precipita de deſſus le toict d’vne maiſon. La mere extremément affligee d’vne ſi barbare cruauté, fut en ſonge par ſon fils auertie de ne pleurer la mort de ſes enfans, d’autant que le temps viendroit en bref auquel les Dieux vengeroiẽt tres-rigoureuſement l’inhumanité des Titans, Conuertis és deux Lumieres du Ciel.& que ſeſdits enfans auoient eſté par leur diuine clemence & miſericorde conuertisen corps immortels, ſi bien que le fils fut faict ce grand Flambeau qui nous eſclaire de iour, & la fille cette belle Lampe dominant ſur la nuict. Pauſanias en l’Eſtat de Corinthe, dit que Titan fut bien expert en l’aſtronomie, & que pour cette raiſon il fut dit frere du Soleil, parce qu’il auoit eſté grãd obſeruateur des ſaiſons de l’annee & de toutes autres opportunitez. Car il fut le premier qui par le cours annuel du Soleil connut quelles plãtes & ſemences il faloit, ou planter, ou ſemer en chaque ſaisõ, afin que le Soleil peuſt acroiſtre & meurir leurs fruits. Titan pourquoi ſe dit frere du Soleil.Et pource qu’il departit tres-gracieuſement aux hommes la ſcience qu’il auoit auec beaucoup de trauail & d’experience acquiſe, on luy donna le bruit, & à ſes enfans auſſi d’auoir voulu enuahir le Ciel, & debouter Iupiter de ſon throſne, pour s’en ſaiſir, & en inueſtir ſes enfans. Alors Iupin arma de ſa foudre, & les aſſomma. Mythologie phyſique.Mais qu’eſt-ce que cette foudre ſinon vn feu tres-ardent, enuoyé par la bonté de Dieu, ou bien vn deſir de la ſcience des choſes celeſtes, comme ainſi ſoit que la bonté diuine rauit à ſoy ceux qui ſont embraſez d’vn zele & amour de connoistre les mysteres diuins ? Car ce n’eſt pas ſans l’aide de Dieu, ny ſans la force des aſtres, que nous ſommes épris, ou que nous paruenons à vne ſcience de ſi haute matiere. Et ceux qui s’eſleuent à cet eſtude ont le ſang eſchauffé d’vne force ignee, ſelon que quelques-vns tiennent que les Muſes ſont les ames des ſpheres celeſtes, ſuiuant le dire de Virgile au 2. des Georgiques :

Chez elles quant à moy , les Aonides ſœurs, Dont me plaiſent ſur tout les plaiſantes douceurs, Et dont ſentant mon cœur atteint d’vn amour forte, Les myſteres ſacrez, ſacré Preſtre, ie porte, Me reçoiuent ſur tous d’vn accueil gracieux, Me montrent le chemin & les aſtres des Cieux.

Mais ceux qui ont le ſang de qualité plus froide, ſont plus enclins aux voluptez qu’à aucune ſcience : ce que peu aprés il montre, diſant :

Mais ſi vn ſang, qui froid la poitrine me gele, M’empeſche d’approcher ces ſecrets que recele De nature le ſein ; ſeuls me plaiſent les champs, Et les fleuues herbeux le dos des vaulx léchans.

Cette chaleur de ſang, & ce temperament de tout le corps nous ſert comme d’vn aiguillon pour nous employer à ce où nous enclinons le plus : que ſi nous entreprenons quelque choſe à l’encontre, c’eſt en vain, ou pour le moins nous n’en viendrons iamais à bout qu’auec beaucoup de peine. Les autres ont creu que Titan ſoit Saturne, ou le Temps. Orphee en l’hymne de Titan :

Titan tres-pur, tres-fort, & puiſſant en conſeil.

Car comme ainſi ſoit que toutes choſes naiſſent par le moyen du temps, comme ſi elles deuoient eſtre plus que mortelles, ſi eſt-ce que peu à peu vaincuës par la chaleur du Ciel, elles viennent à defaillir, & cedent à ces diuins eternels corps, auſquels il ſembloit qu’elles ſe vouluſſent oppoſer, ou les eſgaler. Ainſi doncques les choſes de ce monde meurent, touchees de la foudre, parce que comme la chaleur cauſe la generation, auſſi fait elle la corruption. Inuentiõ des Anciens en la fabrique de cette Fable.Parquoy les Anciens ont voulu par cette Fable ſignifier les choſes humaines qui naiſſent en chaſque ſaiſon, & que le temps meſme, comme leur frere, cede aux corps celeſtes : leſquelles par la viciſſitude de la chaleur tendent les vnes à leur fin, les autres à leur naiſſance ; car quand au moyen de leur vieilleſſe & decadence elles ont finalemẽt exhalé leur feu contre les autres elemens deſquels elles ſont cõpoſees, elles viennent à ſe diſſoudre & defaillir. Titans peres des hommes & des Dieux.Les vns doncques ont nommé ces choſes humaines du nom de Titans, & les vertus diuines, du nom de Iupiter, Hercule, & d’autres diuers noms de Dieux. Et d’autant que le temps eſt iſſu du Ciel, & du cours annuel du Soleil, & que toutes choſes qui ſe peuuent engendrer, ſe font en luy, & naiſſent par luy ; pour cette cauſe ont-ils dict que les Titans eſtoient és Enfers, & les ont qualifiez du tiltre de Peres des hommes & des Dieux, comme faict Homere en l’hymne d’Apollon :

Exaucez ma priere, ô Ciel aſtré, toy Terre, Et vous Titans bourgeois de l’infernal parterre, Du palais Stygien és plus enfoncez lieux, De qui ſont tous ſortis les hommes et les Dieux.

Et de tous animaux.Pareillement Orphee en l’hymne des Titans les appelle la ſource & fontaine de tous animaux, quelque part qu’ils ſoient :

O Titans, de la Terre & du Ciel noble engeance, Peres de nos ayeuls, qui voſtre demeurance Faites deſſous la terre au tartaré manoir, Source & commencement de ce qui peut mouuoir Ses aiſles emmy l’air, ou qui la terre habite, Ou qui va fendant l’eau ſous les flots d’Amphitrite.

Autres auis touchant cette Fable.Dauantage, quelques-vns ont eſtimé que Titan ſoit le Soleil, & que la Terre eſt ſa femme : pource que de ces deux corps toutes choſes ſont produites à veuë d’œil. Les autres veulent dire que les Anciens ont voulu par cette Fable donner à connoiſtre les mutations de elemens, & ont appellé Titans ces elemens qui cõtiennent en eux quelque choſe de terreſtre & groſſier, qui par la vertu des corps ſuperieurs ſont continuellement chaſſez ça-bas. Car le Soleil par ſa force ne ceſſe d’attirer à ſoy des vapeurs, leſquelles eſtans montees, ſont par la vertu des corps celeſtes diſſoutes en des Elemens tres-purs, ou renuoyees en bas : & ce combat ou choc des vns aux autres dure à perpetuité iuſqu’à la diſſipation de tout l’Vniuers. C’eſt ainſi que quelques-vns ont expliqué cette Fable des Titans, & cette expoſition concerne les choſes naturelles. Que perſonne n’vſe impunément de temerité, ou d’autre voye de mal-verſation en la Religion diuine nous l’auons ailleurs declairé, & pourtant il n’eſt ja besoin de recercher icy vne explication ethique ou morale. Nous entrerons donc au diſcours des Geans.