D’Aſope.

CHAPITRE XVIII.

Genealogie d’Aſope.LE fleuue d’Aſope, de qui Iupiter transfiguré en feu rauit la fille, fut fils de l’Ocean & de Tethys, ſelon Acuſilas : Apollodore Athenien au 3. de ſa Bibliotheque le faict fils de Neptun & de Pero : Nicanor de Samos au 2. liure des riuieres, de Iupiter & de Clymene : Seſoſthene au 9. liure de l’hiſtoire d’Eſpagne, d’Himere & de Cleodice : Pauſanias en l’Eſtat de Corinthe, de Neptun & de Cegluſe : Phanodeme en l’Eſtat d’Attique, de Salamis & d’vn certain Panopee. La plus grãde part des autheurs diſent qu’il fut Thebain, & eſpouſa Merope fille de Ladon riuiere d’Arcadie, de laquelle il engendra Pelagus & Iſmen, & vne vingtaine de filles : entre leſquelles ſont Theſpie, Peroe, Thebe, qui donna nom à la ville de Thebes ; Combe ſurnommee Chalcis, la premiere inuentrice des armes de cuiure en vne ville d’Eubœe qui pour l’amour d’elle fut appellee Chalcis. Item Salamis, Platæe, Harpinne, Corcyre, Ægine, leſquelles, ont donné nom à autant d’iſles : Iſmene, Antiope, Aeroë, Cleope, Nemee, laquelle Iupiter ayant priſe en amitié, il luy promit de luy donner tout ce qu’elle demanderoit : lors elle luy requit le don de perpetuelle virginité. Item Tanagre, Sinope, des noms deſquelles, ou de leurs enfans ont eſté nommees pluſieurs places & villes. Car à cauſe que Neptun tranſporta la Nymphe Corcyre en l’iſle de Scherie, elle quitta ſon ancien nom, & fut dicte Corcyre, puis Phæacie, à cauſe de Phæax qui naſquit là ; on l’appelle auiourd’huy Corfou. Quant à Sinope l’on en doute fort : toutefois pluſieurs aſſeurent qu’Apollon la rauit, & l’emporta au Royaume de Ponte, duquel elle engendra Syrus, qui donna nom à la Syrie : mais Denys en la ſituation du monde dit que Iupiter l’enleua. Neantmoins les autres maintiennent que Sinope fut l’vne des Amazones ; & les vns la font fille de Mars & de Parnaſſe, les autres de Mars & d’Ægine. Voyez au liure 6. chap. 17.Aſope eut auſſi vne fille nommee Ægine, que Iupiter luy rauit : & comme le pere eſtoit en extreme peine pour l’amour de ſa fille, voicy venir Siſyphe qui fit telle pache auec luy, qu’en luy enſeignant où elle eſtoit, il luy donneroit vn ruiſſeau d’eau courante en l’Acrocorinthe, qui eſt vne haute montagne, au pied de laquelle eſt la ville de Corinthe. Là deſſus il la luy decela, voire meſme luy fit entendre comme Iupiter l’auoit violee. Voila le ſuject de la punition & tourment que Siſyphe endure aux enfers, ſelon le dire d’aucuns. Aſope foudroyé par Iupiter. & ſa fille tranſmuee en iſle.Calimache dit que comme Aſope couroit aprés Iupiter pour le ſurprendre ſur le faict, il fut par luy frappé de foudre, & ſa fille tranſmuee en vne iſle de meſme nom qu’elle. Poſidippe au liure des Dieux & des Heros dit que Theſpie fut auſſi fille d’Aſope, à laquelle Apollon accorda ces trois poincts, qu’elle nommeroit de ſon nom vne ville en la Bœoce vers la montagne d’Helicon ; que Vierge elle ſeroit placee au ciel parmy les eſtoilles, & qu’elle auroit le don de prophetie. Or Aſope a eſté vne riuiere de la Bœoce paſſant par Thebes, Platæe & & Tanagre, ayant ſa ſource en vn lieu dict Arethyræe. Apollodore au 3. liure dit qu’Aſope paſſſoit par la ville de Thrachyne qu’on appelloit iadis Scole ; mais que depuis que la foudre y chut, il reprit ſes premieres erres, & rentra en ſon ancien canal, & que long temps depuis on vid floter ſur ſon eau des charbons. Toute cette eſtenduë du pays qui eſt autour de Thebes, auprés de la montagne de Cytheron, s’appelloit Aſopie du nom de cette riuiere. Pauſanias eſcrit en l’Eſtat de Corinthe, qu’Aſope auoit ſa ſource és marches des Phliaſiens, & de là paſſoit à trauers les terres des Sicyoniens, puis ſe iettoit dans la mer auprés de Corinthe : mais pource qu’il y a eu pluſieurs riuieres ainſi nommees, cela eſt cauſe qu’on ſituë cet Aſope, en diuerſes prouinces, & qu’on luy donne diuerſes ſources. Cependant les Anciens d’vne riuiere ont faict vn homme, luy attribuans les actions ſuſdites. Quelques-vns croyent qu’il ait eſté voirement homme, & que comme il piochoit, ou autrement foüilloit en terre, il trouua vne ſource d’eau qui fut la premiere origine de cette riuiere nommee Aſope comme luy.

¶Mythologie d’Aſope.Or ils diſent qu’il fut fils de Iupin, ou de Neptun, ou de l’Ocean, d’autant que les riuieres ſe font de l’air (qui eſt de Iupiter) mué en eau ; comme dit Ariſtote és Meteores : ou bien parce que la mer eſt le commencement & origine de toutes les riuieres. Il a pluſieurs filles, qui ſont ou ruiſſeaux, ou autres proprietez d’eaux qui ſont nommees de diuers noms. Quant au conte qui le faict auoir eſté foudroyé par Iupiter aprés luy auoir enleué ſa fille ; c’eſt que telle ſaiſon aduint vne fois que le haſle & la chaleur de l’air fit en partie deſeicher l’eau de cette riuiere, laquelle ainſi appetiſſee ſe conuertit en vapeurs, qui pourſuiuoient Iupiter, c’eſt à dire montoient en l’air : en ſomme la chaleur continuant de plus en plus, peu s’en falut qu’il ne tariſt entierement : voila ce qui fit dire que la foudre l’auoit frappé. Et de faict il auint vne exceſſiue ſeichereſſe autour de Thebes & en l’iſle d’Ægine. Il faut maintenant traitter de Deucalion.