ET d’autant que l’eſprit humain ne peut eſtre vtilement oiſif, ils ont voulu par l’inuention de Plute exhorter les hommes à l’eſtude du labourage, diſant que Plute eſtoit fils de Cerés, c’eſt à dire, que les richeſſes ſont filles de la terre, comme ainſi ſoit que les biens procedans du rapport de la terre ſont de tres-iuſte acquiſition. On le feignoit eſtre aueugle, departiſſant les biens aux hommes ſans aucun reſpect : parce que les conſeils de Dieu ſont inconus aux humains, & ne les peuuent ny ne doiuent rechercher trop curieuſement ; ains ſe contenter de leur condition. Mais afin qu’on ne penſaſt point qu’aucune choſe aduint temerairement & ſans la prouidence de Dieu, ils ont mieux aymé introduire vn Dieu aueugle, que de permettre qu’on creut aucun forfaict ſe pouuoir commettre au deçeu de la Majeſté Diuine.